Khalta mualpho tur ChP-a'n a chhan

Mizoram Super League-a vawi hnih champion tawh Khatla TBL-in Ningani zan khan kaithar Republic VR4 chu hun tawp hma minute khat velah lehpel chauhin 69-63 in hnehna an chang.

Hawla Indoor Stadium-a inkhelah Vanchuangpuia chuan point 26 a neih zinga point 16 chu fourth quarter tawp bera a neih niin Armed Veng tlangval hi Khatla chhandamtu a ni.

Fak phu Liama
Khatla TBL-in an sulhnu leh theihna hmachhuanin court an lut a, awlsam taka chak turah inngai mah se Lianhmingmawia telna VR4-in nuamsain an awmtir lo.

Liama hian point 21 a nei a, basket a neih tam tak hi inum boruak nun ṭhat lai tak a nih hlawm avangin a hlu lehzual a. Tlarhnungah pawh Kanan tlangval hian rebound 11 zet a nei a, MSL2 MVP Vanlalmuana'n vawi hnih ngawt 3-point a neih hnuah Liama an ventir a, Dawrpui Vengthar tlangval a langsar zui lo.

VR4 tan tawnhriat nei ṭha dang Darliansanga'n game a siam a, rawlthar duhawm Lalbiakkima'n point 12 neiin vawi thum 3-point a nei a, hun tawp hma thlengin chak tura ngaih an ni. Amaherawhchu hun tawp hma hretin player ṭhenkhat naupanna a lan a, turnover an ngah avangin hun tawpah a lungngai zawkah an ṭang.

Chhandamtu ChP-a
TBL khelh chhiat zan tih phat rual a ni lo a, chutihrualin khel ṭha tur pawhin an player tam zawk fitness a ṭha tawk lo a, tawnhriat an nei ṭha tih loah chuan champion rinkai atana chhal harsa khawpin an che thei lo.

Amaherawhchu hun tawpah team ṭha a danglam a, VR4-in Tuikual South aṭanga TBL zawmtu Vanchhuangpuia dan ngaihna an hre lo, ChP-a hian quarter tawp bera Khatla point neih 23 aṭanga 16 chu a khung.

TBL-in Republic chhaih buai turin time out an hmang ṭha a, hun tawp lamah palian luh tirin 'full court pressure' an pe a, VR4-a player naupang an chi ai a, hun tawp meuh chuan point nga laiin an chak thei hial.

Khatla hian February 20, Thawhlehni hian Tuikual South an hmachhawn ang a, hnehna an chang a nih chuan semifinal an lut ang. VR4 pawhin knockout luh beiseina an la nei a, February 22, Ningani zanah Tuikual South tho an hmachhawn ang.