Arsenal an chak nuamsa

Arsene Wenger-a nauten Europa League last 16 lut turin hmabak hautak an nei tawh lo. Ningani zan last 32 first leg inkhelah Arsenal hian Swedish club Ostersunds FK 3-0 in an va luhchhuah a, February 22 zan hian Emirates Stadium-ah second leg an khel leh ang.

Champions League aṭanga tla Borussia Dortmund leh Atletico Madrid ten awlsam taka hnehna an chan laiin, Serie A hmahruaitu Napoli erawh an mikhual Bundesliga club RB Leipzig lakah 3-1 ngawtin an tlawm thung.

Goal thum
Jamtkraft Arena, Ostersund-ah khaw vawh lam chu -4C lai a ni. Inkhelh nan aritifical turf hman a ni a, Premier League-a beisei phak lo Arsenal tan thil a awlsam vak lo tura ngaih a ni.

Beisei aiin mikhual team lamin bul an ṭan fuh, minute 13-na lekah Gunners forward Alex Iwobi-a ball pet chu Ostersund goalkeeper Aly Keita-a'n dan sak mah se, a per rawn let chu Nacho Monreal-a'n awlsam takin a khung.

Manchester United aṭanga Arsenal zawmtu Henrikh Mkhitaryan a hlauhawm chhunzawm a, Armenian captain ball cross chu centre back Sotirios Papagiannopoulos-a'n an mahni lamah a dang pial lut.

Second half-ah mualneitu Ostersunds an insiamṭha hret a, ball pawh an chang tam sawt. Mahse, an phur vanglai takin Germany international Mesut Ozil-a'n hnai tak aṭanga an goal thumna khungin an chak a nemnghet.

Petr Cech aia luhtir Arsenal goalkeeper David Ospina-a'n hun tawp dawnah penalty a dang a, Colombia international hian an goal a lut thei tur dang vawi li ngawt ṭha deuhin a dang bawk.

Wenger a lawm
Arsenal hian Dortmund aṭanga an lakluh Pierre-Emerick Aubameyang an chhawr thei lo a, hliam vangin France striker Alexandre Lacazette chu a khup zai vangin a chawlh a ngai bawk. Hmatawng laia awm turin Danny Welbeck chiah an nei a, Ostersunds an hneh hnuah hliam an neih belh loh avangin Wenger chuan a lawm thu a sawi.

Gunners manager Wenger chuan, "Inkhelh tir lamah kan insiamrem nghal a, a tirah Ostersund an talbuai zauh kha kan vanneih phah a ni. Goal hnih faia hma kan hruai tawh kha chuan kan goal venhim kha a pawimawh tawh ka hria a, kan hlawhtling bawk,"

"Kartawpah match kan neih loh avangin player ṭha an inkhel thei a, natural grass ni loa kan khelh vang erawh kha chuan hliam neih belh leh kan hlau hle, hnehna kan chan bakah player hliam dang nei loa kan awm thei kha a lawmawm hle a ni," tiin a sawi.

Beiseina
Ostersunds FK chairman Daniel Kindberg chuan tun hnaia an club hmasawn chhoh dan chu lawmawm a tih thu a sawi a, nakin lawkah Champions League an la khelh phak hial a beisei thu a sawi.

Swedish club hi English manager Graham Potter-a'n a enkawl a ni a, kum 2010 hnu lamah division pathum ngawtin hma an sawn tawh. Fans 9,165 nen Arsenal an lo mikhual a, European football khel ṭhang Gunners lakah a tir lama tihsual an nei zeuh tih mai loh chu an khel chhe hran lo–keeper Ospina an paltlang thei lo mai a ni.

Potter chuan, "Arsenal hi champion tura rinkai berte zinga mi an ni a, an player ṭha ṭhenkhat an rawn hruai lo chung pawh khan ram khat aiawha inlan thei an rawn hruai thei nual a ni. Penalty kan hlah a, kan hun ṭha neih a thamral nual bawk, ka naute khelh danah khan lawm lohna tur a awm lo," tiin a sawi.

Inkhel dang
Michy Batshuayi-a'n a khelh ṭhat chhawm nung zelin Borussia Dortmund tan goal hnih a khung leh a, Belgian striker hian Bundesliga club hi Atalanta lakah 3-2 in hnehna a chanpui. Chelsea aṭanga loan hmanga chhuak Batshuayi hian a club thar tan match thum a khelhah goal nga a khung tawh.

La Liga team ṭha Atletico Madrid pawhin FC Copenhagen 4-1 in an sawp, Diego Simeone team tan hian Saul Niguez, Kevin Gameiro, Antoine Griezmann leh Vitolo ten goal khat ṭheuh an khung.

Germany international Timo Werner goal hnih khung hmangin RB Leipzig pawhin Napoli 3-1 in an luhchhuah a, kum 21 mi Werner hian tun season inelna hrang hranga match 29 aṭangin goal 16 a khung tling ta chiah a ni.