Thu awih lo Neymar a party!

Paris St-Germain forward chhuanvawr Neymar chuan February 5-a a piancham lo thleng tur pualin Pathianni zan khan party a huaihawt a, nightclub lar Yoyo-a party-ah hian footballer langsar hmuh tur an awm nual. 

PSG coach Thomas Tuchel chu he hunah hian hmuh tur a awm lo a, kum 46 mi coach hian, "Thil ṭul lo tak a ni a, kan serious lohzia leh professional lohzia pholanna a ni," tiin Neymar-a birthday party neih tur hi a lo sawisel lawk tawh. 

Mahse, coach thusawiin Neymar-a rilru a thlak phah lo a, Brazilian forward hian a duh ang takin party a huaihawt ta tho a, a player pui hmuh tur an awm nual bawk.

Neymar chuan he party-ah hian a ṭhiante chu thawmhnaw var ha chunga inlan turin a ngen a, PSG tana a khelhpui Edinson Cavani, Mauro Icardi, Marco Verratti leh Angel di Maria bakah hliam vanga chawl mek Lyon winger Memphis Depay te an tel.

Player rualin coach thu an awih lo a, nimina chanchin thar ber chu nizana Nantes nena league match khel PSG squad-ah Neymar a tel lo - hei hi hliam a neih vang niin an sawi thung. 

PSG hian nizana an inkhelh hmaa an match hnuhnung berah Montpellier chu 5-0 in an sawp a, Neymar hian hliam tenau a nei. French club chuan a hliam endik a nih hnuah Neymar tan Nantes hmachhawn theih a nih loh thu an sawi. 

PSG coach Tuchel chuan, "Ka player-te thlavang ka hauh fo ṭhin a, he team hi ka hmangaih. Mahse, party an neih avangin ka player-te thlavang hauh a har sawt tih ka hria a, mahse thil dik lo tawp tia sawi tur erawh a ni lo. 

"Midangte tana min sawichhiatna remchang kan siam erawh pawi ka ti a, chutihrual chuan player-te hi an party vang emaw an chhuah avangin squad 

aṭangin ka paih ngawt lo," a ti a, Neymar a inhliam tak tak thu a sawi. 

Neymar-a party-naa tel player langsar Edinson Cavani,  Mauro Icardi, Marco Verratti leh Angel di Maria te chu nizana inkhel squad-ah hian telh vek an ni. 

Tuchel-a'n star rual enkawl hautakzia a tem chho zel dawn niin a lang a, Neymar-a thu awih loh kara tun hnaia kawh mawh bawl langsar chu Kylian Mbappe a ni. 

PSG-in Montpellier an hnehna inkhelah khan Kylian Mbappe chu lakchhuah a nih avangin a lungawi lo hle a, a ṭhian kawmngeih tak Neymar-a party-ah pawh a kal lo. 

French striker hi Neymar-a party buatsaih lai hian in lamah Super Bowl inkhel a en a, PSG star rual chanchin hi a la ngaihnawm chho dawn chauh niin a lang.