Bagan an chak, AFC hmabak harsa zel

19th February, 2018

Nimin tlai khan Mohun Bagan-in Manipur khawpui Imphal-ah Khuman Lampak Main Stadium luhchhuahin Nercoa 3-2 in an hneh a, Mariners hian point 24 hmuin palina china awm tum Aizawl FC aiin point rukin an sang tawh zawk.

Mizo club hian zanin dar 8:00 hian season liam taa I League an champion-na hmun Jawaharlal Nehru Stadium-ah Shillong Lajong an hmachhawn ang.

Inthuam ṭha
Aizawl FC hian match li an khelh hmabaka ṭha taka khel turin squad an thuam ṭha mek a, I League season khatnaa an defender Lalchhawnkima chu ISL club Mumbai City aṭangin an hawh a, Champhai tlangval hian Lajong a hmachhawn thei ang.

AFC coach thar Santosh Kashyap tan Royal Wahingdoh leh Mumbai FC-a a defender pawimawh Chhawnkima an lalut thei hi chanchin lawmawm a ni a, Indian Arrows nena hnawhchhuah C. Lalrosanga a thlak rin a ni.

Mizo club hian East Bengal leh Mohun Bagan striker hlui Chidi Edeh be fel tawh mah se Nigerian striker hi visa a la fel loh avangin chhawr theih a la ni lo. Mizo club hian inhliam Kareem Omolaja leh Yugo Kobayashi te an chhuahtir dawn a, Japanese forward Yugo an thlak dawn em tih a chiang lo.

Pangana tal?
Tun dinhmunah Aizawl FC hi paruknaah an awm mek a, an chunga awm Shillong Lajong nen an point inang mah se Mualpuiah an hneh loh avangin head to head-ah an pha lo.

Mizo club tan palina ni pha turin panganaa inhlankai phawt a ngai a, chumi tur chuan zanin hian Lajong hi an hneh a ṭul dawn a ni.

Champion inum
Neroca-in Subhash Singh (16') leh Felix Chidi (24') hmangin ṭum hnih hma hruai mah se Mohun Bagan-in Asier Dipanda Dicka goal hmangin minute 21 leh 30-naah an sut a, Akram Moghrabi-a'n first half injury time-ah Mariners chakna goal a khung.

Manipur club hi chak lo mah se pakhatna an ni chhunzawm a, amaherawhchu Neroca hian anmahni hnaih bertu Minerva Punjab aiin match thumin an khel tam zawk.

East Bengal pawh season hmasa lam ang thoin season tawp boruak an zo lo a, Khalid Jamil-a hote hian Inrinni zan khan Gokulam Kerala 2-1 in an hneh lo a, Kolkata club-in I League nomawi an chawi theih a beiseiawm ta lo hle.