MFA Futsal League final-ah Chhinga Veng Vs Chanmari

Tualchhung football ropuina Chhinga Vengin Chanmari chhuhsakin Mizoram Premier League nomawi an chhuhsak a, Mizoram veng lian pahnih hi RFL Plastics MFA Futsal League final-ah an intawng leh dawn. Nomawi inchuhna hi February 23, Zirtawpni zanah R. Dengthuama Hall, Mualpuiah neih a ni dawn a, en man hi Rs 50 ang.

February 16 zan semifinal second leg-ah Chhinga Vengin first leg-a 3-2 a an hneh tawh Saron Veng chu 5-4 in an hneh nawn a, Chanmari leh Durtlang te 4-4 in inhnehtawk mah se first leg-a 8-0 a chak tawh Chanmariin final an lut.

Vawi 3-ah vawi 3
Chhinga Vengin league round-ah Saron Veng an hneh tawh a, semifinal vawi hnih an hmachhawnah chak leh vekin vawi thumah vawi thum an hneh.

Second Leg-ah hian Chhinga Vengin C. Lalmuanpuia leh Van­lalthanga te hmangin ṭum hnih hma hruai mah se Saron-in Lalremtluanga goal hnih leh K. Lalhmangaihkima te hmangin an lehthal a, 3-2 a hnufual hmanin aggregate-ah an inhnehtluk chiah.

Amaherawhchu, team ṭha zawk Chhinga Veng an muthlu rei lo a, Saron keeper chetfuh loh zan an tawn fuh bawk avangin hun tawpah erawh 5-4 in an chak a. Final-ah player che rang rual an inlar dawn tihna a ni a, coach Lalremruata hoten an mamawh chu Chhinga Veng mipui puihna a ni.

Avid-a a inhliam
Durtlangin first leg-a 8-0 ngawta an mualphona theih­nghilhin huaisen takin Chanmari an bei let a, amaherawhchu football lamah pawh tawnhriat ngah tawh awm khawmna Chanmari an tlo. Minute 20 chhungin goal sarih a lut a, Chanmariin 4-3 in hma an hruai.

Hun tawp hma hretin Lalruatfela'n Durtlang siphurh a sut a, second leg-ah tlawm haw lo mah se first leg result vangin final lut thei an ni lo. Chanmari erawhin harsatna nei loin final an thleng a, an tana thu lawmawm lo awmchhun erawh an khung khawl David Laltlansanga chu inhliam vangin first half-ah lakchhuah a ni a, Chawnpui tlangval tun inelnaa goal 14 khung tawh Avid-a hi final-ah a dam hman ang em tih hriat a ni lo.

Semfinal - February 16, Zirtawpni
Saron Veng 4 - 5 Chhinga Veng
SAR : Lalremtluanga 12'(P), 18'; K. Lalhmangaihkima 28'; Lalramliana 50'
CHH : C. Lalmuanpuia 11'; Vanlalthanga 13', 47'; Malsawmtluanga 29'
(OG); Lalsawmzela 36'
MoM : C. Lalmuanpuia, Chhinga Veng
Aggregate-ah Chhinga Veng 8 - 6 in an chak
Durtlang 4 - 4 Chanmari
DUR : Lalchungnunga 3'; P.C Lalhruaitluanga 9',15'; Lalruatfela 49'
CHA : Samuel Laltlanthanga 4'; Rochhingpuia 5'; David Laltlansanga 11';
Vanneihtluanga 20'
MoM : Rochhingpuia, Chanmari
Aggregate-ah Chanmari 12 - 4 in an chak