Relegation Playoff khel tur Hollow BBSP
Mizoram Super League-a Mission Veng Derby hmasa berah champion lai Mission Veng Vikings-in Zirtawpni zan khan Mission Vengthlang Hollow BBSP chu 65-62 in an hneh.
Hawla Indoor Stadium-a inkhelah Mission Vengthlang in bul an ṭan ṭha a, MSL4-a a vawi khat nan chak hmel an hmu ngei dawn niin lang mah se quarter tawp berah an chesual a, an inpawhthlaktir leh avangin table mawngphah an chhuahsan dawn lo.
Relegation Playoff
Hollow BBSP-in MSL an khelh season khatna ang thoin relegation playoff an khel dawn a, league round-ah chak hmel la hmu lo mah se champion lai Vikings nena an khelh dan thlirin tla tura dah erawh a la rem lo.
MSL-ah hian pangana leh paruknain relegation playoff an khel a, heta chak lo zawk hi an relegate chauh. A chak zawkin MSL qualifying-a pahnihna nen Mizoram basketball inelna sang ber khel tur an zawng leh dawn a ni.
Ronald = 98 not out
MSVT Hollow-in chak la nei lo mah se Ronald Zomuanpuia erawhin basket a ngah ziah a, Vikings lakah point 26 neiin match li aṭangin point 98 a khung.
Hollow guard Ronald hian Republic VR4 (24 pts), Khatla TBL (26), Tuikual South (22) leh Vikings (26) te hmachhawn tawhin point 20 a lut kim vek.
A hmuhnawm ṭan
Mission Veng Vikings-in vawi hnih champion tawh Khatla TBL an hneh zawh hnuah ni sarih chawlin, Hollow nena an inkhelh ṭumin chawlh an hmang ṭha lo tih lang mah se hnehna an chan tho avangin hmahruaitu an ni chhunzawm zel.
February 21, Nilaini hian Vikings-in Mizo hlanga team ṭha bera ngaih Zarkawt BCA an hmachhawn dawn a, league round-a hmahruaitu nih tuma inbeihna hi a hmuhnawm ang.
Naktuk zan hian Khatla TBL-in Tuikual South an hmachhawn dawn a, vawi hnih champion tawh TBL hian hnehna an chan chuan semifinal an lut dawn. February 22-ah TKS-in kai thar Republic VR4 an hmachhawn leh ang a, he inkhel zawh hian knockout stage lut tur a hriat kim dawn a ni.