PSG an kal fawr

Champions League nomawi kawltu Real Madrid an ngam loh hnua an match hmasa berah Paris St-Germain chuan an mikhual Strasbourg chu 5-2 in an sawp ve leh nghal a, Unai Emery naute hian champion lai AS Monaco lakah point 12 zetin hma an hruai fal tawh.

Spanish manager Emery-a'n insiamṭhat nghal a duh zia lantir nan a player ṭha rual a chhawr nghal a, mah se minute rukna lekah goal an chhuah–Strasbourg midfielder Jean-Eudes Aholou chuan goal hmaruai a khung.

Amaherawhchu, Paris club an buai zui phah lo. Germany international Julian Draxler-a'n minute li hnu lekah an si phurh sutin, Brazil captain Neymar a inlar zui zat bawk.

Tun hnaia khel ṭha tluang tak Angel di Maria-a'n an goal thumna a khung zui bakah Edinson Cavani-a'n goal hnih neih belhin, Uruguay international hian tun season inelna hrang hrangah match 35 a khelh aṭangin goal 30 a khung tling ta.

PSG manager Unai Emery chuan, "Madrid laka kan chak loh hnuah hnehna kan chang leh thei ta a, kan taksa bakah rilru lam siamthar leh nan hnehna kan chang thei hi a ṭha hle," tiin a sawi.