Bayern Munich an chak tlai

Hun tawp dawna Robert Lewandowsk penalty chhuih luh hmangin Bayern Munich chuan Wolfsburg 2-1 in an hneh hram a, Bundesliga match 13 zet a zawnin hnehna an chang ta–anmahni hnaih bertu Bayer Leverkusen aiin point 21 zetin an sang fal tawh zawk a ni.

Inrinni zan inkhelah Wolfsburg midfielder Daniel Didavi chuan minute riatna lekah goal hmahruai khungin an mikhual team a barakhaih a, Bayern tan Arjen Robben-a'n sut theihna hun ṭha nei mah se Dutch forward penalty pet hi keeper Koen Casteels-a'n a dan sak.

Real Madrid player hlui Robben-a'n a tihsual hliahkhuh nan Sandro Wagner tauh luh tur a siamsak a, Robben bawk hian hun tawp dawnah penalty hlawh chhuak lehin substitute Lewandowski-a'n chakna goal khung nan a hmang.

German champion Bayern Munich hian Thawhlehni zanah Champions League khel turin Besiktas an mikhual dawn a, hei vang hian manager Jupp Heynckes chuan Lewandowski, Mats Hummels, David Alaba leh Thomas Muller te bench lamah hun a hmantir a, goal an mamawh hunah erawh a player ṭhate hi a luhtir ta tho a ni.

Bayern manager Heynckes chuan, "Wolfsburg khan bul an ṭan fuhin an khelh ṭha hle a, min chhiah mangang tluan zak a ni. Mahse, bench aṭangin player ṭha an lut thei a, a bik takin Muller kha a daihzaiin inkhel boruak thlak danglamtu a ni," tiin Germany international a fak hle.

Inrinni zan inkhel dangah Hoffenheim chu Schalke lakah 2-1 in an tlawm a, nizan khan Borussia Dortmund leh RB Leipzig ten match an nei ve leh bawk a, hnehna an chang a nih chuan Leverkusen an lehpel leh ang.