MFA Futsal Division I Team ṭha pali a hriat ta

MFA Futsal Division I chu Inrinni khan R. Dengṭhuama Multipurpose Hall-ah group stage khelh zawh a ni a, Zonuam FC hnung zuiin Otei FC, IDBI Capital leh Aizawl khaw pawn club Vengthar United ten knockout stage an lut a, semifinal hi February 20, Thawhlehni hian khelh a ni ang.

Group D-ah Otei FC-in goal difference an neih ṭhat avangin semifinal lut turin draw chiah an mamawh. Team ṭha zawka ngaih Paul FC lakah Otei FC-in an huaisenna lantirin 7-7 in an draw a, point khat hlawh chhuakin semifinal an lut.

Group C-ah Zonuamin match hnihah hnehna chang tawh a, besei tur nei tawh lo inkhelah Laipui FC Jr-in Chronicles chu 6-1 in an hneh.

Group B-ah Kawnpui club Vengthar United-in semifinal lut turin Aizawl Venglai chu 9-1 in an sawp a, an dawta Cici Store leh 77 FC Junior inkhel result-in nghawng a nei tawh lo. Goal 20 luhna inkhelah Cici Store 15-5 in an chak.

Group A-ah IDBI Capital-in anmahni elpha ber tura ngaih Ramhlun FC chu 5-1 in an sawp a, knockout stage an lut a, semifinal ticket la tlai ber ni mah se champion rinkai an ni ang.