Robula Chess Trophy-ah Nunsanga pakhatna

Robula Chess Trophy vawi 40-na chu February 16 khan Synod Conference Centre, Aizawlah khelh zawh niin Leitan tlangval Lalnunsanga a champion. Inelna hi February 13 aṭanga ṭan an i a, lawmmanah hian pawisa fai Rs. 1,01,600 sem ral a ni.

Mizoram chess inelna ngaihhlut Robula Chess Trophy-ah hian mi 65 an inel a, Aizawl khaw pawnlam aṭangin player 30 zet an tel a. Swiss league system hmangin Round 9 khelh a ni a, nomawi chawitu Lalnunsanga hian an khingpuite a hneh vek. Inelna hmachhawn zingah Reiek rawlthar kum 14 mi Johny R. Lalmuanpuia chu a naupang ber a, kum 78 mi Lianhranga, Kulikawn chu a upa ber thung.

Mizo zinga engineer (graduate) hmasa ber Robula bul tumin kum 1978 khan a vawi 1-nan inelna hi ṭan a ni a, kum tinin khelh chhoh zel a ni. Robula thih hnuah a nupui Rinpuii leh a tu leh faten an pa, ‘Robula hming daih loh nan leh Zoram puma chess khelmite tan’ tiin inelna hi Mizoram Chess Association nen ṭangkawpin an buatsaih zui zel a ni.