Chelsea kawr nen Giroud-a'n goal a khung

Antonio Conte-a'n a player pawimawh Eden Hazard, N'Golo Kane leh Cesar Azpilicueta te squad-ah a dah lo chungin Chelsea-in Zirtawpni zan khan Stamford Bridge-ah Hull City 4-0 in an sawp a, FA Cup quarterfinal an lut.

Blues tan hian Willian-a'n goal hnih khungin Pedro leh Olivier Giroud ten an khung belh a, French striker Giroud-a'n Chelsea kawr haa goal a khung hmasak ber a ni. London club hian quarterfinal-ah Sheffield United hnehtu Leicester City an hmachhawn ang. Foxes hian Jamie Vardy goal hmangin Championship club hi an hneh a ni.

Mamawh chhanna Giroud?
Chelsea tan Diego Costa thlaktu Alvaro Morata-a'n beisei a pha lo a, Michy Batshuayi pawhin a intuai hriamna hmun Borussia Dortmund tan goal khung ta fo mah se Blues tan erawh beisei a pha lo. Hei vang hian January transfer tawp niaah Giroud chu Arsenal aṭangin an lalut.

French forward awm hnuah Conte hoten Bournemouth (0-3) leh Watford (1-4) in an hneh lo a, goal khat chauh an khung. Amaherawhchu, Blues-in result an neih chhiat lai hi Giroud-a'n inkhel bul a ṭan hma a ni a, French forward-in starting eleven a chan hnuah erawh West Brom 3-0 in an hneh a, hemi ṭuma goal hmasa ber hi Giroud-a siam a sak a ni.

FA Cup-ah Giroud-a bul ṭantir leh a ni a, Willian-a goal khung tur pahnih a siam sak bakah ama pualin goal a khung. Chelsea ṭantu tan lawmna tur dang a awm a, Emerson Palmieri chuan Blues tana a inlan hmasak berah Giroud-a goal khung tur a siam sak a, first half-ah goal li an khung.

Chelsea-in an clean sheet theih nan keeper Willy Cabellero chuan David Meyler a penalty pet chu a dan sak a, Hull player hnunga ding Giroud chuan Meyler-a penalty petna lam hi a kawk dik. French forward hian goal a neih bakah assists vawi hnih a nei a, Argentine keeper-in penalty a dan theih nana a chetzia a pawimawh chiah em tih erawh a hriat loh thung.

Conte a lawm
Chelsea boss Antonio Conte chuan, "Olivier Giroud-a'n goal a khung a, Willian-a'n ṭha takin a khel bawk a, kan tan chuan zan duhawm tak a ni," tiin a naute khelh dana a lawm thu a sawi.

London club hian Thawhlehni zan hian Champions League last 16-ah Barcelona an mikhual dawn a, Italian manager chuan Catalan club nena an inkhel tur thlir lawk nghal.

Conte chuan, "In ka thlen hunah chuan Thawhlehnia kan inkhel tura thutlukna ṭha ber siam turin thil tam tak ngaihtuah a ngai dawn. Chutihrualin duh thlan tur neih hi kei leh team tan a ṭha a ni," tiin a ṭha zawnga a rilru a buai thu a sawi.