Lord's-ah India-in England an hneh : Men in Blue pacer-te an che ṭha hle

Cricket ngaina 'a tui pawlh loh chin' chuan cricket inelna pathum Test, ODI leh T20-ah Test match an dah sang lawr lak. Thawhṭanni zan khan India-in 'mecca of cricket' an tih mai Lord's-ah mualneitu England chu 151 runs in an hneh a, Test match hlutna hrethiam pha chin chauhin Virat Kohli hote hnehna chan ropuizia an hre thei ang.

Test match vawi nga khelh turah ruahsur vangin first Test-ah an inhnehtawk a, second Test-ah hian first innings zawhah England dinhmun a ṭha hret. Amaherawhchu India tailender-ten India an rawn chhan a, Mohammed Shami (56) leh Jasprit Bumrah (34) ten run ṭhahnem tak siamin an thi lo.

Virat Kohli-a'n thutlukna huaisen siamin 298/8-ah a duhtawk a, England tan target an chhawpsak zat chu 272 runs a ni. Three Lions batsman-te India pacer hmaah an thamral a, 120 runs chauh an siam avangin Men in Blue hi 151 runs-in an chak. Third test hi August 25-29 hian Headingley Cricket Ground-ah khelh leh a ni ang.

Rahul-a century
Joe Root-a hnuaia khel England chu inkhelh hmaa chak zawk tura rin zawk an ni a, amaherawhcu India-in bul an ṭan ṭha. First innings-ah opener Rohit Sharma leh KL Rahul te inkawp chuan 126 runs an siam hman.

Rohit Sharma hian 83 runs a siam a, KL Rahul hian century siamin 129 runs a siam. India tan Virat Kohli (42), Rishabh Pant (37) leh Ravindra Jadeja (40) te che chhe lo mah se tailender lam an chet ṭhat loh avangin first innings-ah 364 runs an siam. India tan Lord's-a 264 runs siam hi a ṭha a, amaherawhchu an bul ṭan ṭhat ngaihtuah chuan a ṭha tawk lo.

Root-a show
England bat hun a thleng a, first Test-a 64 leh 109 runs siamtu captain Joe Root bawk a rawn che ropui. Root hian thi loin 180 runs a siam a, Jonny Bairstow (57) leh Rory Burns (49) te an chet ṭhat bawk avangin first innings-ah India aiin run an siam tam zawk.

Bul ṭan ṭha India chu first innings-a zawh meuh chuan dinhmun ṭha lo zawkah an ding. India bowler zingah Mohammed Siraj-a'n wicket li (94 runs) a la a, Ishant Sharma (69/3) leh Mohammed Shami (95/2) ten wicket an la ve bawk.

Zahna chibai
Second innings-ah India opener-te an che ṭha nawn lo a, Cheteshwar Pujara (45) leh Ajinkya Rahane (61) te zarah 'draw' beiseina awm mah se chak lohna chance a sang zawk. India-in chhantu a mamawh lai takin 'cricket pundit' run siam tlem vanga an sawisel tailender te an rawn lang a, India chu hmun himah an rawh dah.

Ishant Sharma-a'n 16 runs a siam hnuah Shami-a'n 56 tehmeuh a siam a, Bumrah pawhin 34 runs a siam. Shami leh Bumrah te hi a tawp thlengin an dam a, player pahnih hi Lord's Pavilion lama an let chu an teammate-te'n zahna chibai (standing ovation) an buk. India team boruak chu duhthusama ṭha a ni.

Pacer ṭha mi
Virat Kohli-a'n 298/8 runs chu chakpui thamah a ngai a, a duhtawk. England tana target an chhawpsak chu 272 runs a ni a, 60 overs a la awm. ODI chu ni se target harsa a ni lo a, amaherawhchu Kohli hian Test match-ah pawh ni ngana a ni tih a hria a, awmze neiin 'risk' a la.

India pacer-te'n an hna bak an ti a, runs ṭhahnem tak an siam hnuah second innings-ah hian an hna tak tak an thawk. England opener pahnih Rory Burns leh Dom Sibley te chu run siam loin Bumrah leh Shami ten pavilion lamah an lettir.

Men in Blue dinhmun a ṭha chho a, over 22.3-a Bumrah-a'n England captain Root a vawm hlum chiah phei chuan chak tur a chiangah a ngaih theih. Root-a ball vuak mantu hi India captain Kohli a ni a, Lord's-a inkhel chu India ram aṭangin an thlir ṭhup tawh.

India pacer Siraj (32/4), Bumrah (33/2), Ishant Sharma (13/2) leh Shami (13/1) ten England chu 51.5 overs-ah 120 runs chauh siamtirin an vawm hlum vek. Ball hnuhnung pasarihah India-in wicket thum an la!

Engtin zel?
India captain Virat Kohli chuan, "Mi ṭhenkhatin kan tailender chu commentator-ten ṭha an tih tawk loh thu an hrilh a, khelmual hmangin an chhanglet. Hun pawimawhah an rilru huaisenna a lang a, team chakpuitute an ni. Hnehna kan chan tawh zingah chuan a hlu ber zinga mi a ni," tiin a sawi.

England captain Joe Root chuan, "Ka mawhphurhna ka hlen lo a, kan game plan kan tifuh lo a ni. Thutlukna dik chu siam ila kan result hi a dang daih thei ang. Ka thiam loh a ni a, ka tawnhriat aṭang hian insiamṭhat ka tum ang," tiin a sawi thung.

Test Match
• Ni nga chhung an khel ṭhin a ni a, innings vawi hnih a awm. Ni khatah hian khuain emaw thil dangin emaw a bumro lo a nih chuan over 90 khelh ngei ngei tur a ni.
• Hnehna chang tur chuan run siam tam zawk nih ringawt a tawk lo a, vawm hlum kim vek a ngai.
• An khel zo hman lo a nih erawh chuan an inhnehtawk (draw) a puan a ni ang. Entirna : India hian England hi 60 overs chhungin vawm hlum hman lo se, Three Lions hian target an pha hman lo a nih bawk chuan an inhnehtawk ang.
• Declare: Innings vawi hnihna bat hmasaten an run siam chu chakpui thama an ngaih chuan an an duhtawk 'declare' thei. Chutihrualin chak duh vanga 'declare' zinga an chak lo an awm ve tho bawk.
• Tailender: Cricket player-te hi batsman, all rounder leh bowler-ah ṭhenhran an ni a, all rounder chu bat leh bowl kawp theite an ni. Chutihrualin bowler-te pawhin an bat ve vek tho a, batting order tawp lama awm batting lama ṭha vak lo ho hi 'tailender' an tih te chu a ni.