Bagan leh Bengaluru inkhel dawn

Asia khawmualpuia club football inelna sang ber dawttu AFC Cup-ah vawiin tlai dar 4:30 hian ATK Mohun Bagan leh Bengaluru FC an inkhel dawn a, inkhel hmuhnawm beisei a sual lo ang.

AFC Cup-ah ram pawn player pali chiah chhawr theih an ni a, Roy Krishna, David Williams, Hugo Boumous leh Carl McHugh chu Bagan-in ram pawn player an chhawr tur an ni - an ti mai mai lo tih a hriat.

Roy Krishna leh David Williams chanchin sawi nawn a ngai lo a, French-Morrocan attacking midfielder Boumous hi Mumbai City aṭanga vaibelchhe hniha an lei chhuah a ni a, kum 28 mi McHugh hi Scottish Premiership club Motherwell captain hial lo ni tawh a ni.

Kolkata club hian Mizo player kawl an nei lo a, Bengaluru erawhin Mizo keeper Lalthuammawia Ralte an nei thung - chutihrual chuan Gurpreet Singh Sandhu an kawl a, Thuammawia tan hmun chan a beiseiawm loh.

Bengaluru hian ram pawn player pathum chiah squad-ah an telh a, defender pahnih Alan Costa leh Yrondu Musavu King bakah Brazilian striker Cleiton Silva chu squad-ah hian an awm.

Kum 30 mi Alan Costa hi Brazilian second division club Avai aṭanga loan hmanga an hawh a ni a, kum 29 mi Musavu-King hi Gabon tana vawi 14 inlan tawh, Caen, Granada, Lorient, Udinese leh Toulouse tana lo khel tawh a nih avangin a chhe lo.

Cleiton Silva hi kum 34 mi ni mah se season hmasa ISL-a Bengaluru tana lo khel tawh a nih avangin club hrechiangtu a ni a, Thai football-ah chuan 'legend' a nih avangin Asian football-ah a mikhual lo hle.

Group D-a club pahnih inkhel hi Star Sports chuan a pe chhuak dawn a, online-a en duh tan Hotstar lamah a en theih bawk - Bangladesh Premier League club Bashundhara Kings leh Maldivian club Maziya S&RC te chu group D-a club dang awm ve an ni.

Bengaluru hian ISL regular season-ah pathumna an nih avangin AFC Cup hi playoff aṭangin an khel ṭan a, Bagan erawh ISL final an luh avanga group stage lut nghal an ni thung.

AFC Cup group stage hmun ruak hi ISL champion chanpual a ni a, mahse, regular season hmahruaitu chu Champions League-ah an tling thung - Mumbai-in regular season hma an hruai piah lamah ISL nomawi an chawi tel a, Champions League an khelh dawn avangin Bagan chuan group stage aṭangin inelna an hmachhawn phah ta a ni.