Cincinnati-ah Murray a chak

Hliam vangin buai deuh reng mah se Andy Murray a beidawng duh lo. Britain tlangval hian Thawhṭan zan khan Cincinnati Masters khelin, a match hmasa berah Richard Gasquet chu 6-4, 6-4 in a hneh.

Grand Slam vawi thum champion tawh Murray hi a khel bawr na vangin a buai rei ta hle - Tokyo 2020 pawh khan singles match a khel thei lo. Vawi hnih a champion tawhna Cincinnati Masters-ah hian duhsak taka wildcard pek niin, an duhsakna a ti hlawhtling.

Gasquet lakah Murray hian aces vawi 15 a siam a, winners vawi 38 vaw chhuak bawkin a ball vuak a dik leh tawh hle - hliam nei loa a khel chhunzawm zel thei a nih chuan beisei pawh a nei sang leh thawh ang.

Murray chuan, "Ka khingpui khan min chaih phar nasa angreng hle, hmun hran hranah ball a rawn vaw let thin a, lo dawnsawn a harsa thei hle. Mahse, vanneih thlak takin ka ball vuak a dik hlauh, kha vang khan thil a awlsam phah.

"Ka tan chuan match ṭha leh duhawm tak a ni, duhthusam vek la ni chiah lo mah se a pumpui thlir chuan ka ti ṭha thawkhatin ka hria," tiin a sawi a, hun rei tak hnuah ṭha taka a khel leh thei ta chu a lawm thu a sawi.

Inkhel dangah Jannik Sinner chuan a kum 20 tlin cham lawm nan Argentine player Federico Delbonis chu 6-2, 7-5 in a hneh. Fabio Fognini pawhin Nikoloz Basilashvili chu 7-6 (7/3), 6-3 in a lo hneh ve bawk.

Tokyo Olympic gold medalist Alexander Zverev pawh a chak. German tlangval hian aces vawi 11 siam chungin Japanense player Yoshihito Nishioka lakah 6-3, 6-4 in hnehna a chang.

Mipa singles inkhel dangah Felix Auger-Aliassime leh Dominik Koepfer te chuan an khingpui ve ve hnehin second round an inhlangkai ve bawk.