Courtois-a'n contract pawtsei

Belgian international goalkeeper Thibaut Courtois chuan Real Madrid tan contract a ziak thar. Spanish club tan hian 2026 June thla thleng khelh chhunzawm turin contract hi a ziak; Santiago Bernabeu-ah a vanglai hun chu a hmang zo dawn ta niin a lang.

Kum 29 mi Courtois hian Chelsea aṭangin 2018 khan Real Madrid hi a zawm, a man kha pound maktaduai 35 thlenga pung chho thei tura tih a ni. Tunah chuan Real tan nomawi tam thei ang ber chawi a tum ta.

Chelsea tana a khelh lai hian Premier League title pahnih leh FA Cup vawi khat a la hman, 6 ft 7 in zeta sang goalkeeper hi tun dinhmunah chuan khawvela a ṭha berte zinga mi a ni phak.

La Liga match 100 khel tawhtu Courtois chuan, "Tun season hi ka tan chuan Real Madrid ka zawm hnua season li ka hmanna tur a ni dawn, club ropui tak tana ka khel thei leh ka la chhunzawm zel tur hian min ti lawm.

"Ka tan chuan contract thar ziah hi a lawmawm a, chona leh phurna nasa tak min pek belh a ni. Khawvela club ṭha ber tan hian ka theihtawp ka chhuah chhuanzawm zel ang," tiin a khelh mekna Real Madrid chu a dahsang hle.

Spanish club tan Courtois hian La Liga nomawi pakhat leh FIFA Club World Cup pakhat bawk a chawi tawh - season kal laiah Barcelona leh champion lai Atletico Madrid te nen an inel tawk viau tura ngaih a ni.