Champions League khel tur a zawng zel

Europe-a club football inelna sang ber UEFA Champions League khel tur zawnna palyoff first leg chu zaninah khelh chhunzawm a ni dawn. Portuguese club ṭha Benfica leh Dutch club PSV ten zanin dar 12:30 hian Estadio da Luz-ah first leg an khel ang.

Inkhel dangah Young Boys leh Ferencvaros te an inhmachhawn ang a, Malmo leh Ludogorets te a inkhel bawk dawn. Nizan khan match UCL playoff first leg match thum a awm tawh bawk.

UCL chu
UCL group stage-ah hian team 32 an awm ṭhin a, tunah hian team 26 chu an tling tawh. Team ruk dang hi qualifying hmangin an zawng ṭhin a, playoff round an khelh mekah hian team 12 chiah awm tawhin a chak zawk ṭheuh hian Champions League hi an khel thei dawn.

Champions League khel thei tura tling tawhte chu England aṭangin Chelsea, Manchester City, Manchester United leh Liverpool. Spain aṭangin Atletico Madrid, Real Madrid, Barcelona leh Sevilla; Germany aṭangin Bayern Munich, RB Leipzig, Borussia Dortmund leh Vfl Wolfsburg; Italy aṭangin Inter Milan, AC Milan, Atalanta leh Juventus te an ni. England, Spain, Germany leh Italy te hian team pali a thawh a, group stage an lut nghal vek.

France aṭangin Lille leh Paris Saint-Germain te an tling tawh. Playoff aṭanga Monaco an tlin chuan Ligue 1 aṭangin team thum an awm ang. Portugal pawhin Sporting Lisbon leh Porto te an thawh tawh a, Benfica-in playoff aṭangin beisei an la nei.

Russia champion Zenit Saint Petersburg, Belgium champion Club Brugge, Ukraine champion Dynamo Kyiv, Netherlands champion Ajax leh Turkey champion Besiktas te an tling tawh bawk a, an vai hian team 26 an ni.

A ngaihnawm lai chu
Group khatah team li zel an awm a, hemi a nih avang hian fixtures siam hian pot pali a awm a, pot khatah hian team pariat zel an awm. Team ṭha ber dahna pot 1-ah hian Champions League champion Chelsea, Europa League champion Villarreal bakah league sang paruka champion an awm.

Pot dang hi chu coefficent ranking (Page 9-ah ranking kimchang a awm) hmangin an rem. La Liga-ah Atletico Madrid an champion a, Barcelona erawh coefficient ranking hmangin pot 2-ah an awm. Lionel Messi telna PSG pawh an champion bik lo a, coefficient ranking hmangin pot 2-ah an awm ve bawk a, chumi awmzia chu Messi hian group stage-ah a club hlui hi a hmachhawn thei lo.

Group stage-ah hian ram khat club dah kawp theih a ni lo a, PSG hi entir nan hmang ta ila. French club-in pot 1, pot 3 leh pot 4 a mi club-te nen group khatah an awm kawp thei tihna a ni. Parisan club hi an vanduai a nih chuan Manchester City, Ajax leh AC Milan te pawh an awm kawp thei tihna ni a, Europe inelna sang ber hi fixtures pawh aṭangin a ngaihnawm nghal ang.

Playoff chu
Playoff-ah hian Champions Path leh League Path a awm. Champions Path-ah hi chuan ram khat champion vek an awm a, ram tenau club-te an nih hlawm avangin team tenau anga chhiar theih vek an ni.

League path-ah erawh mahni league champion pha lo, club ṭha si a awm theih avangin team ṭha an awm nuk. Tun ṭumah pawh hian league path-a la damte chu Monaco, Shakhtar Donetsk, Benfica leh PSV Eindhoven te an ni a, heng zinga pahnih hian UCL an khel dawn. Heng team-te hi team lian zawk barakhaih thei turin theihna an nei vek.