Arsenal-ah Xhaka a nghet

Granit Xhaka chuan AS Roma a pan mai dawn nia a lan hnuah a hawi kir a, a khelh mekna Arsenal tan contract thar a ziak ta zawk. Switzerland international hi Gunners tan 2024 thleng a khel chhunzawm dawn, a contract hi kum khat atan pawhsei theih a ni bawk ang.

Kum 28 mi Xhaka-a contract neih lai hi 2023-a tawp tur a ni, tunah hian kum khat atan a pawtsei tihna a ni - khawthlang media lamin an tarlan dan chuan a hlawh hi a pung nghal bawk.

Swiss midfielder hian North London club-ah hian hun harsa leh hlimawm a lo tawng tawh ṭhin. FA Cup nomawi vawi hnih a chawipui tawh, mahse a khelh dan duhkhawp loh vangin fans auh elna pawh nasa takin a lo tawk tawh.

Captain a nihna hlihsak a ngai hial a, chumi hnuah huaisen takin a lo kir. Tun season Premier League an match hmasa berah manager Mikel Arteta-a'n captain armband a hrentir a, a hreng chhunzawm a nih pawhin a mak lo ang.

Season bul ṭan fuh lo Arsenal hian an midfield ti chak thei tur an la melh reng. Nikum lama loan hmanga an hawh tawh Martin Odegaard chu an lakluh duh ber niin, a khelh mekna Real Madrid thu leh hla an la nghak mek.