A hma aiin ka ṭha tawh - Lukaku

Romelu Lukaku chuan amah duh loa hralhtu Chelsea a zawm fel leh tawh a, tun hma lama Blues player a nih lai ai khan tunah chuan player ṭha leh danglam a nih tawh thu a sawi chhuak.

Belgium international hian Chelsea hnuah Everton leh Manchester United tan a khel. Season hnih chhungin Inter Milan tan khel lehin, kum 11 hnua a vawi khat nan Inter chu Serie A title a lakpui hial.

Kum 28 mi Lukaku chuan, "Striker tana tih tur pawimawh ka hriat ang zawng zawng chu ka zirin ka bei zel a, tunah chuan a hma ai khan kawng engkimah ka puitlingin ka ṭha tawh zawk.

"England boruak erawh a danglam tih ka hria, theihna leh thamrum bakah vanneih a ngai tel. Chutih rualin eng pawh hmachhawn thei turin ka inpeih," a ti. Season hmasa khan league goal 24 a khung avangin a inrintawk hle.

Chelsea manager Thomas Tuchel-a'n tun kar tawpa Arsenal an hmachhawn hunah Lukaku hi a chhawr theih a beisei thu a lo sawi tawh, German manager hian eng tiangin nge a chhawr dawn erawh hriat a la ni lo.

Lukaku chuan, "Tlarhma laiah chuan keimah chauhin a ni emaw, midang nen a ni emaw pawh ni se ka khel thei vek. Club bakah Belgium tan khelh dan hran hran kan neih tawh ṭhin avangin ka insiamrem thei zel," tiin a sawi.

Chelsea hian Premier League season thar khuhhawn nan Crystal Palace chu 3-0 in an sawp. August 22, Pathianni zan hian Arsenal hmachhawn turin Emirates Stadium-ah an leng ang.