Barcelona leiba a tam : Buainain kianzai a rel thei lo!
European club ropui Barcelona ṭantuten chanchin lawmawm an hre hleithei lo - club president Joan Laporta chuan Barca leiba chu euro tluklehdingawn 1.35 a tlin thu a sawi leh ta.
Laporta chuan player hlawhah an insen nasat thu a sawi a, hei hian nasa takin club sum dinhmun a tichhia - tun dinhmunah Barca hian an sum lakluh aṭanga 103% chu player hlawh atan an hmang!
March thlaa Barca President thar atana thlan Laporta chuan, "Hlawh atana kan insen ringawt hi kan sum lakluh aṭanga 103% a tling a, chu chu kan elpuiten hlawh atana an insen ṭhin aiin 20-25% velin a sang zawk a ni," a ti.
Bartomeu vang vek!
Laporta chuan, "Barcelona enkawl tura mawhphurhna kan lak ruala kan tih ngai hmasa ber chu loan lak a ni a, euro maktaduai 80 loan kan la nghal a ni - kan tih loh chuan hlawh kan pe thei tlat lo a, kan hmaa hnathawkte khan dawt hlirin hna an thawk a ni," a ti!
Barcelona president chhuak ta Josep Maria Bartomeu chuan kar hmasa khan open letter ziakin insawifiahna a nei a, mahse, Laporta chuan he lehkha ziaka Bartomeu insawifiahna chu dawt vek a nih thu a sawi.
Laporta chuan, "Kan sum neih aiin kan leiba a tam zawk a, kan hmabak hi a manganthlak takzet," a ti a, Bartomeu chhang zuiin, "Sawifiah ngaihna awm lo an tihsual tawh kha sawifiah a tum a ni. An thiltih sual man hi an hmu ngei ang," a ti.
Barca an insingsa
Laporta-a'n Bartomeu sulhnu a chhui a, chinfel tur hlirin a hmuak - khelmualah erawh fan-ten an duh an hmu leh ṭan tawh a, tun season La Liga-a an match hmasa berah Real Sociedad chu 4-2 in an hneh.
Barcelona vice captain Gerard Pique chuan tam tham takin a hlawh a tihniam tawh a, captain Sergio Busquets, Sergi Roberto leh Jordi Alba te chu an hlawh tihniam turin inbiakna an neihpui mek bawk - an inrem theih ngei a rinawm.
Laporta chuan, "Player hlawh hi kan sum lakluh aṭanga 65% - 70% inkara a awm theih nan hma kan la dawn a ni," a ti a, uchuak taka player hlawh pek a tum lo - La Liga chuan Barca hi tun season atan player hlawhah euro maktaduai 88 aia tam insen a phal lo!
Player an inhuam
Pique-a'n a hlawh tihhniam rem a tih khan club-in nipui transfer-a an lakluh Memphis Depay leh Eric García chu squad-ah an ziah luh theih phah a, Sergio Aguero erawh hliam vangin a la chawl mek thung.
Laporta chuan, "Player-te ka hrethiam takzet. Hlawh tihniam tawh sa an ni a, tunah tihniam tura beisei leh an ni mek. Jordi, Busquets leh Roberto te pawh titipui an nuam em em vek a, club leh player te tana ṭha turin thutlukna kan siam ang.
"Player-te hian club ṭhatna tura inhlan an duh em em a, a theih veleh kan inbiakna rahchhuah chu puan a ni ang," a ti a, hlawh tihniam hmasa ber Pique hnenah lawmthu a sawi bawk.