Chelh theih loh Messi

Barcelona-in nipui transfer-ah rin loh takin Lionel Messi an chân a, khawvela footballer thiam ber ang hiala mi tam takin an ngaih hian Paris Saint-Germain chu kum hnih chhung atan a zawm.

Catalan club president hlui Josep Maria Bartomeu chuan October-ah khan a hna aṭanga chawlh luihtir ni lo se club sum dinhmun chu siam ṭhain Messi an chelh theih a rin thu a sawi!

Mahse, Barca President thlanna neih a nih dawna Messi a chelh tur thu sawitu, hei vanga vote pawh hmu hnem anga an sawi Barcelona president Joan Laporta chuan Messi chhuahtir chu thutlukna dik a nih thu a sawi.

Laporta chuan, "Messi kha contract thar ziahpui theih kan inbeisei tlat a, a chhan chu tun ang hian kan sum dinhmun kha kan la hrechiang tlat lo a ni.

"Budget awm hmasa kha kan en lo thei lo a, player kan hralh ṭhen a, hlawh kan tihhniam bawk chuan chelh theih beiseina kha kan nei a ni," a ti.

Laporta chuan sawi zawmin, "Paris-ah Leo hi a hlim hle niin ka hria a, eng hmangaih thawnthu mah hian chatuan a daih tak tak ngai lo a, Leo leh Barca hmangaih thawnthu aia daih rei lo hi a tam zawk chu a ni hial ang.

"PSG-a Leo hmuh chu Barca tan chuan a hrehawm tih ka hria. Mahse, club tana ṭha ber turin thutlukna kan siam a, tun aia dinhmun hlauhthawnawm lehzuala club dah kan duh lo," a ti a, Messi chhuahtir chu club himna tur zawk a nih thu a sawi.