Barca tan beiseina

Barcelona-in Messi an chân a, euro tluklehdingawn khat chuang leiba an nei - fans tan a beidawnthlak a, eng ang takin nge he club hi khai chhuah an nih leh theih ang tih chu zawhna awm a ni mek.

Mahse, Barca president Laporta erawh a beidawng lo - Catalan dan hremi leh politician ni bawk hian 2003-10 khan President hna chelhin Barca hi ropui takin a lo kaihruai tawh a, buaina ata Catalan club khaichhuah theih a inbeisei hi a awm lo hran lo.

Laporta chuan, "Kan dinhmun hi a khirh a, mahse, chanchin lawmawm erawh kan nei tho. Kan ruahmanna leh hmathlir aṭang chuan kan buaina hi rei lo tê bak a ni lo ang - kan club sum dinhmun hi a ṭhat leh vat ka beisei tlat.

"Tunah hian kan hlauthawng miah lo. Kan phur em em a, a êng zawngin kan thlir a, kan dinhmun hi a ṭhat leh vat kan beisei. Kan hmaa chona inchhawp hi a hautak a, hneh tur erawhin theihna kan nei. Barca fan-te leh club pumpui kan inlungrual ka duh - football leh inlungrualna nen chuan he hun harsa hi kan paltlang êm êm ang," tiin a sawi.