ECA-ah ESL club pakua lawmlut

European Club Association (ECA) chhuahsana European Super League din tumtu club 12 zinga pakua chu ECA-ah an let leh a, an zingah hian Premier League club lian paruk pawh an tel.

Premier League 'Big Six' tia hming lem an pek Arsenal, Chelsea, Liverpool, Manchester City, Manchester United leh Tottenham Hotspur te chuan ESL din tum zet mah se an bansan leh tak avangin ECA-ah hian an let leh a, anni bakah hian AC Milan, Inter Milan leh Atletico Madrid te chu ECA-ah hian an let ve leh bawk a ni.

Hetihlai hian ESL dintu zinga mi Barcelona, Real Madrid leh Juventus erawh ECA-ah hian lawm luh an la ni ve lo a, anni pathum hi chuan ESL an la bansan lo mai ni loin kaltlangpui an la tum reng zawk a ni.

Club luhlul
European Super League din a nih khan Juventus chairman Andrea Agnelli chuan ECA chairman a nihna aṭangin banna a thehlut nghal a, Paris St-Germain president Nasser Al-Khelaifi chuan a hmun ruak hi a luah zui nghal.

Fans leh football khawvel nawrna avangin ESL dintu zinga club pakuate an inhnukdawk nghal bawk a, fan-te hnenah ngaihdam an dil zui - Spanish club lian pahnih leh Juve erawhin an ring an tikhawng lui tlat a, ESL bansan tumna an nei lo.

ESL hi a tirah tak chuan club 20 inelna tura duan niin club 12 hming hi puan nghal a ni a, club pathum dang sawm belh tur niin hmun ruak dang panga erawh qualifier hmanga zawn tur a ni - mahse, a tirah club pathum sawm tur anga sawi zinga mi Bayern Munich, PSG, Borussia Dortmund leh FC Porto te chuan ESL an thlawp loh thu an sawi.

Kan kal zel dawn!
May thla khan European football-a thuneitu sang ber UEFA chuan ESL din tura hmalatu zinga club pakuate hi sum chawi turin a lo hrem tawh a, naupang leh grassroots football tih hmasawn nana sum chawi tura tih an ni - an sum chawi belhkhawm hi euro maktaduai 15 a tling.

Hei mai hi a ni lo - UEFA inelna aṭanga an sum hmuh tur 5% chu 2023-24 season atan hren khawtlai sak tur an ni bawk. UEFA chuan hetihlai hian inhnukdawk ve lo Real Madrid, Barcelona leh Juventus hremna tur chu a la ti chhuak ve lo a, an hrem ngei dawn tih erawh a chiang.

Premier League club ho bik phei chuan a hranpain Football Association leh Premier League hnuaiah sum an chawi bawk a, an vaia sum chawi tur belhkhawm chu pound maktaduai 22 a tling - hna ṭha thawh nan hman tura tih a ni.

Nghing ve lo
ESL aṭanga inhnukdawk club pakuate hremna a chhuah lai pawhin Real Madrid, Barcelona leh Juventus an nghing ve lo a, an tumah an chiang - July thla tawp khan club pathum hian thuchhuah an siam zui a, European Super League an kaltlangpui tur thu an sawi!

European club lian pathum hian thuchhuah inṭawm siamin court-a UEFA an khinnaah thiam an chan thu an sawi a, an thuchhuaha a lan danin Commercial Court of Madrid chuan UEFA chu European Super League dintute laka thubuai a siamsak chu titawp turin a ti - an sum chawi tur pawh thaibo sak turin a hrilh bawk.

Real, Barca leh Juve hian, "Court chuan European Super League huaihawt tumtute dilna chu a pawm a, UEFA ngenna erawh hnawlin court thu chhuak anga an kal a nih loh chuan hremna lekkawh a nih tur thu hrilh an ni thung," an ti.

Ruahmanna thar
Club pathum thuchhuah aṭanga a lan danin buaina hi a tawp mai erawh a rinawm loh - Barca, Real leh Juve chuan European Court of Justice, Luxembourg chuan an buaina hi an la en ve leh tur thu an sawi.

Hetihrual hian thiam an chan chhunzawm ngei erawh an inbeisei a ni ang - ESL kaltlangpui an tum thu an sawi a, ruahmanna thar an neih thu an la sawi deuh deuh! Club pathum chuan a tira ESL thlawp lotute pawh thawhpui vek an inhuam thu sawiin ram FA, league, fans, players, manager leh club te chu rawn vek an nih tawh tur thu an lo tarlang tawh.

Club pathum chuan, "Kan hmalak zelna turah UEFA lam aṭanga vauna a awm tawh lo tur hian min tilawm takzet a ni. Chutihrual chuan kan ruahmannaah en ṭhat tur tam tak a awm tih kan pawm a, hei hi inrawnkhawmna leh sawihona aṭangin chinfel theih a ni tih kan hria," an ti!

A chiang lo
Real, Barca leh Juve hian dan hnuaiah tihsual an nei loah an inngai tlat a, "European Union hnuaia dan nena kal dun tlat chungin kan ruahmanna hi a hlawhtlin theih kan beisei a ni," an ti fan.

ESL chairman leh Real Madrid president ni bawk Florentino Perez chuan a tira ESL zawmtu, mahse, chhuahsan leh ta club pakuate chuan contract an ziah vek avangin league chu an chhuahsan ngawt theih loh thu a lo sawi tawh bawk.

Thil buaithlak ni ta chu he thu buatsaih a nih thlenga UEFA a la ngawi tlat hi a ni - European football thuneitu sang ber hian eng angin nge hma a lak dawn a hriat loh a, hetiang boruak buai nuai karah hian ECA lamin club pakua an lo lawm let leh lawi bawk si!

ECA thukhawchang
European club inzawmkhawm pawl, ECA chuan club pakua an lak let chungchang sawiin, "ECA executive board chuan club-ten ESL chu football chhungkua duhdan a nih loh thu an sawi te, ESL kalsan tura thutlukna an siam thu mipui vantlang hriata an sawi te chu uluk takin a ngaihtuah a ni," a ti a, club pakuaten ESL an kalsan chu an lawm let chhan a nih thu an sawi.

ECA chuan, "European club football-in hma a sawn theih nana mi tlemtê ni lo, kan vaia kan hlawkpui theih tura tha thawh tura club-te intiamna chu ECA chuan lawmawm a ti takzet bawk a ni," an ti a, an thutlukna chu European football-a thil thleng duhawm lo tihtawpna a nih nghal thu an sawi bawk.

Mahse, Real, Barca leh Juve te an ṭanna ngaiah an la ṭang reng tih hriat a ṭha a, court hmaa thiam channa lehkha nena ṭang tlat an nih miau avangin ESL leh a chhehvel boruak hi ECA sawi ang mai chuan a tawp lo ang.