Roma-in Abraham a la

Tammy Abraham chuan Chelsea aṭangin Roma chu pound maktaduai 34.1 (€40m) in a zawm. English striker hian kum nga daih contract a ziak a, Giallorossi tan hian jersey no. 9 a ha ang.

Kum 23 mi Abraham hian Chelsea tan match 82 khelin goal 30 a khungsak a, kumina London club-in Champions League leh UEFA Super Cup an champion ṭumah a tel.

Chelsea director Marina Granovskaia chuan, "Tammy hi kan zinga mi a la ni reng a, engtik hunah pawh Stamford Bridge-ah ka lo lawm ang. Academy aṭanga first team thlengin team tan a khel a, kan club tana a hnathawhah kan lawm hle a ni," tiin a sawi.

Blues hian Inter Milan aṭanga pound maktaduai 97.5-a Romelu Lukaku an lakluh avangin Tammy Abraham tan Thomas Tuchel a hnuaiah khelhna hmun chan a harsa dawn a, hemi a nih avang hian English striker hian Jose Mourinho hnuaia khelh a thlang ta a ni.

Abraham chuan, "Club-in min duh tak tak chuan kan hre thei ṭhin, Roma pawhin engkim a tichiang nghal. Roma hi nomawi chawi tuma bei tur zinga mi an ni a, kei pawhin heti lamah hian tawnhriat ka nei a, hlawhtlinna neih belh zel ka duh. Jersey no. 9 ka ha tur hi ka lawm a, inkhelh hun ka nghakhlel hle," tiin a sawi.

Jersey no. 9 hi Bosnian Edin Dzeko-a'n a ha ṭhin a, Man City striker hlui hian tun nipuiah Inter Milan a pan. Tun hmain Rudi Voller-a'n a ha tawh a, ani hian match 198-ah goal 68 khungin 1991 Coppa Italia a champion pui. Kum 1983-a Roma-in Serie A nomawi an chawi ṭuma player pawimawh Roberto Pruzzo pawhin kum 10 chhung jersey number 9 hi a ha, ani hian match 315-ah goal 138 khungin Coppa Italia vawi li a champion pui a ni.