Barca-in Stamford Bridge an zawh chim dawn em?

"Barcelona i hmachhawn dawn a nih chuan mahni mual leh khualmualah 120% a khelh a ngai," tih hi Chelsea manager Antonio Conte-a'n Champions League last 16-ah Barcelona an hmachhawn dawn tih a hriata a sawi hmasak ber a ni.

Zanin dar 1:15-ah Blues-in Barca an mikhual dawn a, Conte-a'n an theihna piah lama khel turin a naute a beisei - Premier League champion hian league lamah an nomawi an humhim a beiseiawm tawh lo a, Champions League aṭanga petchhuah an nih leh chuan Conte-a dinhmun derthawng sa a derthawn belhchhah ang.

Chelsea-in Bournemouth (3-0) leh Watford (4-1) a zawna an hneh loh hnuin West Brom (3-0) leh Hull City (4-0) an sawp leh tawh a, Barcelona hmachhawn tura an mamawh 'inrintawkna' an nei leh tawh. Hei erawh hriat tel a ṭha - Barcelona hi tun season La Liga-ah an la tlawm lo.

Hlim rawh u
Chelsea tan last 16-a Barcelona hmachhawn hi 'Ka dil loh zawk mal-sawmna' tih mai awl tak tur a ni - hetihlai hian Conte erawh a zam duh lo a, Italian manager chuan Catalan club an hmachhawn dawn avanga hlim turin a naute a fuih.

Conte chuan, "Barca hi khawvela team ṭha ber pawl an ni a, Champions League-ah pawh rin hlawh ber an ni hial ang. Chutihrual chuan team ṭha tak hmachhawn tur kan nih avangin kan phur tur a ni a, team ṭha tak laka kan theihna tak tak pholanna remchang kan nei tur hi kan vannei a ni," a ti.

Italian manager chuan sawi zawmin, "Barca chungchang kan sawi chuan khawvela team ṭha ber chungchang kan sawi tihna a ni. A ṭha thei ang bera kan khelh a ngai dawn a, an chak lohna lai dek fuh chunga hnehna chan tum a ngai a ni," a ti a, Blues hi chak thei an ni - vawi 12 an intawn tawhah vawi li chakin an chak hnem zawk a, vawi nga an in draw.

Messi hlau rawh u
Chelsea thiampuipa Eden Hazard-a'n, "Lionel Messi hi chu he khawvel pawn lam mi a ni," tiin a thiam chungchuan bik zia a sawi a, zaninah Blues tlarhnung ten Ballon d'Or chawimawina vawi nga dawng thei hi dan an tum ang.

Kum 30 mi forward hian tun season-ah goal 27 a khung tawh a, assist vawi 17 a nei tawh - match 37-a khelh tawh aṭanga goal inrawlhna a neih zat hi 44 a ni. Messi dan a har dawn tih a chiang a, chutihruala Blues fans tana thu hriat nuam tur chu Messi hian Chelsea lakah goal a la khung miah lo!

Conte erawh record hluia innghah a duh lo. Juventus boss hlui chuan, "Messi hian Blues lakah goal khung lo zel se ka duh takzet. Chutihrual chuan player ropui tak a ni miau a, kan fimkhur a ngai a ni," a ti - Blues tana hriat tel tur chu Barca hian English football-a lo tlangnel tawh Luis Suarez an nei tel tih hi a ni.

Hei le Barca
Barcelona-in an league match hnuhnung berah Eibar chu 2-0 in an hneh a, coach Ernesto Valverde-a'n an inkhel chu Chelsea hmachhawn tura an inpuahchahna a nih thu sawiin player ṭha tumah a chawlh hahdamtir lo.

Valverde chuan, "Chelsea hmachhawn tura inpuahchahna ṭha tak a ni a, game hautak tak kan khelh avangin Stamford Bridge kan lenluh hunah he inkhela kan tawnhriat hian min pui thei ang. Hnehna chang turin kan kal dawn a ni," a ti.

Barcelona hian Philippe Coutinho chu tun season-ah Liverpool tana Champions League-a khelh tawh avangin an chhawr thei dawn lo - Brazil midfielder hi Eibar lakah pawh bul ṭantir a ni chuang lo a, Valverde-a'n a sawi lawk anga Blues laka inpuahchah nan an hman vang niin a lang.

Thlir kir ila...
Chelsea-in tun season Champions League-ah beisei angin an khel lo. CL-a an home match hnuhnung paliah vawi khat chiah an chak a, Barca-in khualmuala an match pathumah goal an chhuah miah lo thung - Champions League-a an match hnuhnung pasarihah an tlawm miah lo bawk.

Chutihruala hriat tel sak ṭul erawh Barca hian tun season-a khualmuala European match thum an khelhah goal khat chiah an khung - Juventus leh Olympiakos chu 0-0 in an inhnehtawkpui a, Sporting Lisbon laka 1-0 a hnehna an chan ṭum pawhin 'own goal' chu an chakna a ni.

Chelsea-in awlsam takin last 16 an lut bik lo - Roma nen Stamford Bridge-ah 3-3 a an inhnehtawk zet hnuin Italy-ah 3-0 ngawtin an mualpho a, Atletico Madrid laka point li an hlawh leh sawp 'bur' Qarabag an lo awm chu an vanneihna a ni - Blues-in striker thar Olivier Giroud an nei tawh a, Hazard a awm bawk avangin Premier League champion hian Barca hneh turin theihna an nei.