Season tawpah Super Cup awm dawn

Nimina AIFF League Committee inhmukhawm chuan season tawpah I League club leh Indian Super League club te inelna tur Super Cup a awm tur thu an tichiang.

All India Football Federation hmunpui Football House, Delhi-a meeting hi AIFF senior vice president Subrata Dutta chuan kaihruaiin deputy chairman Lalnghinglova Hmar bakah member dang BK Roka, Anil Kumar leh Chirag Tanna te an inlan a, an thurel hi a pawimawh avangin AIFF general secretary Kushal Das, I-League CEO Sunando Dhar, AIFF COO Kishore Taid leh AIFF Competitions AGS Anil Kamat te an tel bawk.

Super Cup chu
Super Cup final round hi ruahman dan chuan March 31 leh April 22, 2018 inkara khelh tur a ni a, team 16 inelna turin I League leh Indian Super League aṭangin club pariat ve ve an tel ang.

Final round khel tur hian league pahnih aṭangin a sang paruk ve ve chu an tling nghal ang a, a hnuai pali ve vein hmunruak dang chu playoff hmangin an chingfel ang. Playoff hi March 12-31 inkara khelh tur a ni.

Inelna hi knockout hmanga khelh a ni dawn a, a khelh hun tur hi AFC Cup-a Aizawl FC leh Bengaluru FC te result a zirin la siamrem tur a ni a. Super Cup hi hmun khata khelh tur a ni a, Cuttack leh Kochi te chu inelna thleng turin an buk ang a, chumi zawhah thutlukna siam a ni ang.

Super Cup-a foreigner awm zat tur hi la tihchian a ni lo a, thulukna chu club neitute nena an inhmuhnkhawm leh hunah tihchian a ni ang.

Thurel dang
I League second division khelh dan tur sawiho a ni a, team 18 chu group pathumah ṭhenhran an ni ang a, home leh away hmangin inelna hi kalpui tur a ni.

Group khat aṭangin a sang pahnihin final round an lut ang a, tling zingah ISL reserve team an tel a nih chuan final round khelh theihna ticket chu team dang hnenah hlan a ni ang.

AIFF Youth League kalpui turin hmalakna siam a ni a, state association hnuaiah inelna hi kalpui phawt tur niin state tin champion-in AIFF age group league hi an khel dawn a ni.

Thlirna Tawi
• Super Cup-ah team 16 an inel ang.
• Inelna hi knockout hmanga khelh tur a ni.
• Playoff hi March 12-31, 2018 inkar khelh tur a ni.
• Final Round hi March 31 leh April 22, 2018 inkara khelh tur a ni.
• Inelna hi Cuttack-ah emaw Kochi-ah neih a ni ang.
• I League leh ISL club pariat ve ve an tel ang.
• League pahnih aṭangin team parukna chin ve ve an tling nghal ang.
• I League table-a 7-10 na ten playoff hmangin hmun ruak pahnih an inchuh ang a, ISL-ah pawh a hnuai lam paliten playoff hmangin hmun ruak pahnih an inchuh ve bawk ang.