Number 1 Federer tan nomawi

World number 1 ni thei upa ber Roger Federer chuan chanchin lawmawm a neih hnuah nomawi a chawi chhunzawm nghal. Swiss star hian Grigor Dimitrov hnehin Rotterdam Open champion a ni a, tennis a khelh hnuah nomawi 97 a chawi tling ta.

Pathianni zan final inkhelah Grand Slam vawi 20 champion tawh Federer hian world number 5 Dimitrov hi 6-2, 6-2 in a sawp a, hnehna chang tur hian minute 55 bak a mamawh lo a ni - Dimitrov nen hian vawi sarih an intawn tawhah hnehna a chang fai vek.

Kum 36 mi Federer hian semifinal a thlen chiah khan Rafael Nadal lehpelin number 1 a ni leh dawn tih a chiang tawh a, kum 2012 October thla hnua a vawi khat nan a chung berah a awm ve leh ta chiah.

Tun season Grand Slam hmasa ber Australian Open champion Fededer chuan, "Kar tir lama ka thil tum kha chu semifinal thlen kha a ni a, tunah chuan ka lunglawm a kim ta, ka tan chawlh kar nuam leh ṭha ber a ni," tiin a sawi.

Open Era chinah American hranghlui Jimmy Connors-a'n nomawi 109 a chawi thei a, a vawi thum nana Rotterdam title latu Federer hian nomawi chawi hnem lamah chuan 12-in a la phak lo.