Zaninah Khatla leh Tuikual South
Mizoram Super League Season lina league round chu tunkar hian a tawp dawn a, match li chiah a awm tawh avangin zanin dar 7:30-a Khatla TBL leh Tuikual South inkhel tur aṭangin a pawimawh dawn a, a hmuhnawm nghal ang.
Inkhel nghawng
MSL-a vawi hnih champion tawh Khatla TBL tan zanin hi league round-a an match hnuhnung ber a ni dawn a, semifinal thlen theih loh dan kawng a la awm. Inkhel dang result-a an innghah loh nan TBL tan Tuikual South hneh hi a ṭul dawn a ni.
TKS tan pawh hahdam zawka Republic VR4 an hmachhawn theih nan TBL an hneh a ngai a, semifinal an khel pha lo a nih chuan relegation playoff an khel thung dawn. A tawi zawng chuan Tuikual South inkhelh hmabak pahnih a pawimawh ve ve tihna a ni.
En bik tur ChP-a
Khatla-in Tuikual South aṭangin Vanchuangpuia an la chhuak a, Armed Veng tlangval hian TBL-ah hmun pawimawh chang nghalin an match hnuhnung bera Republic VR4 an hneh ṭum phei chuan a khel ṭha lawr lak.
Amaherawhchu, TBL rinrawl ni ṭhinten ṭum dang an pha lo a, an innghahna H. Laldinsanga chu India national team coaching staff zingah a tel avangin a awm loh a lang hle. Khatla player-te fitness a ṭha tawk lo a, an khelh dan hmangah pawh kum danga an danglamna ang kha a awm lo.
Zanin hi Khatla TBL tan team anga fiahna a ni dawn a, tun season-a an hneh pahnih hi kai thar VR4 leh chak la nei lo Mission Vengthlang Hollow te an nih avangin an khelh tawh chinah chhuan tur an nei lo.
Tuikual South pawh
Tuikual South-in inrintawk takin champion lai Mission Veng Vikings an hmachhawn nghal a, chak an inrinna a tlawm zawkah an ṭan avangin team chhungah nghawng lian tak a nei tih zep tur a awm lo.
TKS hian Hollow chauh hneh an la nei a, an season ṭha lo hi Khatla TBL an hneh theih chuan season ṭha a ni leh thei dawn a, coach KC Lalliantluanga hote hian bul ṭan ṭha lo mah se a tawp khar ṭhat an tum dawn.
Zanin hian court chhunga team kaihhruaitu F. Zodinthara bakah player thar Lalnunpuia Renthlei te an pawimawh dawn a, eng team pawh chak se upset a ni lo ang.
Entu lam hi
MSL4-ah entu mipui an tlahniam a, chhan tam tak awm theih zingah state pawn player awm lo chu chhan pakhat a ni.
Mission Veng Vikings chauhin state pawn player an ziaklut a, champion lai hian Ronald March an la nawn a, team dang zawngin Mizo hlangin an khel a, American player hian Mizoram a rawn thlen loh avangin MSL4 hi Mizo hlanga khelh mek a ni.
Chutihrualin Mizo hlangin tualchhung basketball hian vawi tam entu mipui ṭhahnem tak a lo hui khawm tawh a, MSL4-ah basketball ngainatute ṭan an lak thar leh a ṭul ta. Tuikual South leh Khatla hian entu ngah theih turin theihna an nei a, MSL club tihlutu veng pahnih te hi a bul ṭantuah an ṭan a ṭul ang.