Real-in goal khung an harsat lo

Pathianni zan La Liga inkhelah Real Madrid-in goal nga ngawt an khung a, an mikhualna ramah Real Betis chu 5-3 in an hneh. Real hi table-ah palina an nih chhunzawm a, an chung chiaha awm Valencia chu khelh zat inangah point khatin an phak lo mek.

Real tan Marco Asensio chuan goal hnih a khung a, Sergio Ramos, Cristiano Ronaldo leh Karim Benzema ten goal khat ṭheuh an khung ve bawk–Real tana chanchin lawmawm loh chu Marcelo inhliam thu a ni a, Zinedine Zidane chuan a player hliam hi serious tak a nih loh thu erawh a sawi.

Pathianni zan La Liga inkhel dangah Atletico Madrid chuan hnehna an chang ve bawk a, an mikhual Athletic Bilbao chu 2-0 in an hneh–Atletico tan Kevin Gameiro leh Diego Costa ten goal khat ve ve an khung.

Real 'tak tak'

Real Madrid-in La Liga leh Copa del Rey-ah champion an beisei theih tawh loh avangin Zinedine Zidane leh a nau ten sawiselna an tawk nasa–tun hnaiah erawh Real-in an zia tak tak an chhuah leh ṭan a, Paris St-Germain laka 3-1 a chak hlim team inkhel hi a hmuhnawm hle.

Minute 11-na lekah Asensio-a'n goal hmahruai a khung hnuah Betis-in Aissa Mandi leh Nacho own goal hmangin Real an chhanglet a, Zidane-a naute an talbuai phah lo–chawlhlawk hman a nih hnuah Ramos, Asensio leh Ronaldo ten goal an khung ve lehnghal a, Asensio leh Ronaldo goal hi goal 'class' a ni.

Betis beiseina chhi nung turin Sergio Leon-a'n minute 85-naah khung ve leh mah se Real an talbuai phah lo a, hun pek belhah Benzema-a'n goal khat dang khung ve lehin hnehna an chang.

Ronaldo is back

Season ṭantir lamah Ronaldo-a'n beisei phak lo mah se tun hnaiah Portuguese forward hian ngai a awh leh ṭan tawh a, a match hnuhnung paruk aṭangin goal 10 a khung. Real boss Zidane chuan, "Ronaldo-a'n goal a khung reng avangin kan lawm a, amah pawhin nuam a ti a ni," a ti.

Zidane chuan sawi zawmin, "Season tawp kan hnaih tawh avangin game zawng zawng a pawimawh vek tawh. Ka player ten ṭha taka an khel hi ka tan chuan hmuh a nuam em em a, ka hlim takzet a ni," a ti a, Ronaldo chauh ni loin player tinin hma an sawn thu a sawi.

French manager chuan inkhel chungchang sawi nghalin, "Game hautak a ni a, mah se kei chuan khatiang kha ka hmuhnawm tih chi a ni. Goal thum kan chhuah a ni mai thei a, mah se chu lam chu ka ngaihtuah duh lo. Goal nga kan khung avangin ka lawm a ni," a ti.

Zidane faktu Asensio

Real-in Betis lakah si phur chungin chawlhlawk an hmang a, second half-a an comeback theihna kawngah Marco Asensio chuan chawlhlawk laia Zinedine Zidane-a thusawi an chhawr ṭangkai thu a sawi.

Tun season-a Real tana goal kua khung tawh Asensio chuan, "Dressing room-a titina hun kan neih kha kan chhawr ṭangkai a, kan tih dik lohte siam ṭhain kan comeback theih phah a ni," a ti a, Zidane a fak.

French manager erawhin a thusawi a sawi chhawng duh lo a, "Dressing room-a kan thusawi chu pawnah a chhuak tur a ni lo. Ni e, ka naute hnenah thu ka sawi ngei a, second half-ah pawh kan khel ṭha ngei. Mahse, anmahni ngei pawhin first half aia khelh ṭhat an duh a, theihtawp an chhuah a ni," tiin amah a infak duh lo.

Atletico tan Costa

Athletic Bilbao lakah Atletico Madrid-in zahngaihna an lantir lo a, goal khung tur erawhin second half an nghah thlen a ngai–Kevin Gameiro chuan Antoine Griezmann hnen aṭanga a ball hmuh chu hmahruaina goal ni turin a khung a, Diego Costa chuan a chhunzawm ve bawk.

Chelsea aṭanga Atletico a zawm hnuah Costa hian match riat a khel leh tawh a, Bilbao laka goal a khung chiah khan goal li a khungna chiah a ni. Costa hian first half-ah penalty beisei mah se pek a ni lo a, a lungawi loin referee a tawng avangin card pek a ni.

Costa chuan, "Mi ṭhenkhat hi chuan min haw ve hrim hrim niin a lang a, card min pek an chak em em a ni," a ti a, Atletico boss Diego Simeone erawhin, "Kan sawi hnem lutuk chuan referee tan a buaithlak thei a, nakin zelah penalty min pek loh zel phah ang," tiin a sawi zawm duh lo.