Minerva-in Gokulam an mikhual dawn

I League khelh mekah champion turin Minerva Punjab dinhmun a ṭha tawh hle–nomawi chawi tura an inum pui pahnih East Bengal leh Neroca te an match hnuhnung berah an chak lo ve ve a, Punjab club dinhmun a ṭha sawt hle.

Minerva-in match li khelh tur an la neihah vawi thum hnehna an chan theih chuan an hmabak match thumah East Bengal chak vek pawh ni se an champion tawh dawn a, match khat chiah khelh tur nei tawh Neroca tan champion sawi rik ngam a ni tawh lo.

Vawiin chawhnu dar 2:00-ah Minerva hian Gokulam Kerala FC an mikhual dawn a, an kalkawng erawh a awlsam dawn lo–Kerala club hian an match hnuhnung pahnihah Mohun Bagan leh East Bengal a zawnin an hneh thei a, a tira fixture hautak tur nia lang lo hi hmachhawn an harsa dawn.