Juve leh Napoli inkarah point khat

A zawna season ruk chhung Serie A champion ni tawh Juventus tan an nomawi kawl lai humhim a awlsam bik tawh dawn lo. Turin club hi hmahruaitu Napoli lakah point khatin an hniam zawk mek.

Pathianni zan inkhelah Juventus leh Napoli ten hian an khingpui lakah goal khat ve ve in hnehna an chang a, Italian champion nih tum inum boruak a nung chho zel.

Juventus hian first half-a Alex Sandro goal hmangin Torino chu 1-0 in an hneh. Striker Gonzalo Higuain chu minute 15-na lekah hliam vanga lakchhuah a ngai a, goal dang khung belh thei lo mah se an ṭang tluan thei thung.

Massimiliano Allegri naute hi tun hnaiah an khel ṭha tluang thei hle, inelna hrang hrangah match 10 an chak zawn hnuah Tottenham nen an inhnehtawk a, Torino laka hnehna chan leh ngal thei hi an tan result ṭha a ni.

Inkhel dangah Napoli chuan minute rukna leka Marques Loureiro goal hmangin SPAL an hneh. Napoli hian a zawnin league match vawi kua ngawt hnehna an chang ta a, club record thar niin; tun season chhung bikah goal khat faia hnehna an chan hmasak ber ṭum a ni bawk.

Napoli tan hian an club tana goal khung hnem ber nilai Marek Hamsik chuan an goal hnihna a khung a, mahse video assistant referee (VAR) hman a nih hnuah offside vanga pawm a ni lo