Red card 10 phawrh hnuah inkhel ti tawp!

Brazil-a Bahia state championship inkhela Vitoria leh Bahia inkhelah red card 10 ngawt phawrh a nih avangin inkhelh chhunzawm theih a ni lo a, inkhel tihtawp a ni!

He inkhelah hian yellow card pariat phawrh a ni a, first half-ah ringawt yellow card paruk phawrh niin mualneitu Vitoria tan Denilson chuan goal a khung.

Chawlhlawk hman a nih hnuah Bahia chu minute 50-naah penalty pek an ni a, pet goal tu Vinicius chuan mualneitu Vitoria fan-te lam hawiin a goal khung hi a lawm a, a lam.

Buaina a chhuak zui a, team pahnih player zingah inhnek an awm nual! Minute 16 ngawt inkhel chawlh lailawk a nih hnuah referee-in player pariat a hnawt chhuak–Vitoria player pathum red card hmuh tir an nih laiin Bahia player panga hnawhchhuah an ni bawk.

Inkhelh chhunzawm ni mah se hun tawp nan minute 11 chauh a awm tawh tihin Vitoria player pahnih hnawhchhuah ve leh an ni a, inkhel tihtawp a ni–Bahia zawk hi 3-0 a chak a puan an nih a rinawm.