Petra Kvitova kutah nomawi

Petra Kvitova-i tennis khelh thiamna ban vei lam chu chemte hmanga hliam sak a ni a, Czech Republic nula hian Pathianni zan khan a kut hmang ngeiin nomawi a chawi leh thei ta.

Qatar Open final-ah seeded 16-na Kvitova hian set hmasa ber hloh zet mah se a insiamṭha nghal a, Wimbledon champion lai Garbine Muguruza lakah 3-6, 6-3, 6-4 in hnehna a chang. Tun inelna bikah hian world number 10 chin Caroline Wozniacki, Julia Gorges, Elina Svitolina leh Muguruza te a hneh thei a ni.

Kum 27 mi Kvitova hian thlatir lam khan St Petersburg title a la tawh bawk a, kuminah nomawi pahnih a chawina chiah niin WTA ranking chhuak thar berah chuan a sang 10 zingah a inhlangkai leh tawh dawn a ni.

World number 21 Kvitova chuan, "Nikum kha chuan tun ang hun hi ka tawng leh thei ang em tih chu ka ngaihtuah ṭhin, hun hlimawm ka tawng leh ta hi nuam ka ti takzet a ni," tiin a sawi.

Wimbledon vawi hnih champion tawh Kvitova hi 2016 khan a chenna Prostejov, Czech Republic-ah chemte hmanga beih a ni a, a hliam hi zai zui niin inenkawl nan pawh hun a duh rei hle. Season hmasa khan a rawn kir a, beisei angin hlawhtling nghal lo mah se tun season-ah erawh player hmuhnawm leh kaltluang ber pakhat a ni.