Aizawl FC tan Super Cup a chiang lo : I League champion tum Minerva an tawlhthlu
All India Football Federation-in season tawpah Super Cup a awm dawn tih an nemngheh zanah Aizawl FC-in an elpui Shillong Lajong chu 2-1 in khualmualah an hneh lo a, nimin tlai inkhelah Gokulam Kerala-in champion tum Minerva Punjab 1-0 a an hneh avangin Mizo club hi I League table-ah pasarihnaah an tla thla.
Super Cup khel turin team paruk an tling nghal dawn a, coach thar Santosh Kashyap-a hnuaia khel AFC dinhmun a him ta lo. Minerva Punjab pawhin East Bengal an hneh loh hnuah Gokulam lakah point an hlawhchhuah zawh loh avangin Punjab club hi pahnihnaah an awm chhunzawm a, kai thar Neroca leh East Bengal tan champion beiseina a la nung zel.
An risk sual?
Aizawl FC-in Paulo Meneses hnuaia result ṭha an neih loh avangin India ram football hrechiang Santosh Kashyap an lalut a, Mumbai FC coach hlui kaihhruaina hnuaiah team nem bera ngaih Indian Arrows an draw hnuah Thawhṭanni zan khan Shillong Lajong 2-1 in an hneh lo.
Shillong-a inkhelah Mizo club aiin Lajong an khel ṭha zawk a, second half-ah mualneitu hian an phu ang ngeiin Adoulaye Koffi (58') leh Saihou Jagne (73') te hmangin goal an khung.
A tlai tawh hnuah Mizo club an ṭang chauh a, hun tawp lama an goal nawr nat rah sengin injury time minute ruknaah Leonce Dodoz hmangin an siphurh an sut ṭhen a, result erawh a danglam pha lo.
I League champion lai tan match hniha point khat hlawhchhuah hi a ṭha lo a, tun dinhmunah chuan Paulo Meneses thlak nana tlai hnuhnawha Santosh Kashyap an la hi an 'risk sual' tia sawi theih a ni.
Mah se
Mizo club hian Portuguese manager kaihhruaina hnuaiah Shillong Lajong hi RG Stadium, Mualpuiah an hneh bik lo. Hei chauh hi ni loin Aizawl FC hian kuminah match 11 an khel tawh a, match hnuhnung paruk chu khualmuala khelh vek a ni a, Iran thlenga inkhel tura an fehchhuah avangin an chau tih phat rual a ni lo.
Harsatna belhchhah turin season ṭantirh lama an player pawimawh Kareem Omoloja chu inhliam vangin Aizawla Neroca an hneh loh hnuah an chhawr thei tawh lo a, Lajong an hmachhawn ṭum hian 'food poisoning' vangin defender Masih Saighani an chhawr thei lo a, coach thar Kashyap-a chhawr theih turin foreigner pathum Andrei Ionescu, Dodoz leh Alfred Kemah Jaryan te chiah an awm.
I League fixture fuh tawk loh vangin match hnuhnung pahnih aṭangin Kashyap hi teh chi a la ni lo a, amaherawhchu tun Zirtawpnia Indian Arrows an mikhual hunah erawh chhuanlam a nei thiang tawh lo ang.
Champion inum
Gokulam Kerala-in minute 76-naa Henry Kisekka goal hmangin khualmualah Minerva Punjab an hneh a, Punjab club kutah nomawi la awm mah se East Bengal nen match khelh zat inangah point thum chiahin an inthlau tawh a, hmahruaitu Neroca point hnihin an pha lo bawk.
Club pathum Neroca, Minerva leh East Bengal te champion tumin an um chho dawn a, amaherawhchu I League fixture vang thoin an inum boruak hian a vawrtawp a thleng kher lo ang. Season liam taa Aizawl FC champion ṭum angin tun season-ah chuan champion thei team-te hi an match tawp ber an khel rual dawn lo a, chutihrualin league thuneituten inkheh hun a thlak a nih chuan East Bengal leh Minerva te bik erawh an match hnuhnung ber khelh rual theih dan a awm thung.