Gareth Bale-a'n Zinedine Zidane a vau?

Real Madrid forward Gareth Bale chuan thla thara Paris St-Germain nen Champions League last 16 an khelh hunah bul a ṭan loh chuan Santiago Bernabeu chhuahsan chungchang a ngaihtuah tur thu manager Zinedine Zidane a hrilh niin an sawi.

Wales international hi PSG nen an intawn hmasakah khan bench aṭangin khelmualah a lut ve chauh a, Premier League champion Chelsea nen sawizawm an lo ni bawk nen chhuah mai a hnial lo niin Spanish kartin chanchibu Don Balon chuan an tarlang.

Bale hian kum 2013 khan Tottenham aṭangin Real Madrid hi pound maktaduai 86-in a zawm a, a hunlaia player manto ber a ni. Madrid khaw club tan inelna hrang hrangah match 172 khelin goal 76 a khung sak a, mah se hliam vanga a talbuai reng avangin Real-ah a tlatlum lo sawt hle.

Beisei anga season hmang lo Real hian tun hnaiah ngai an awh leh mek tawh a, an league match hnuhnung berah khan Real Betis chu 5-3 a hnehin La Liga-a goal 6000 khung thei hmasa ber an ni.

Real hian zanin dar 11:15-ah league match khel turin Leganes chu khualmualah an lenchilh ang.