Roger i awmna tur hmunah i awm - Rod Laver

"Kawng thui tak a ni a, a chang chuan hun harsa tawn chang a awm bawk; chu tichunga hetiang dinhmun ka thleng leh thei hi ka lawm a, taksa hrisel chunga nitin nuamti taka tennis khelh aia thlan tur dang a awm chuang lo," tiin Roger Federer chuan world number 1 dinhmun a luah leh hnuah a sawi.

Australian tennis legend, a hminga Grand Slam khelhna tur court an siam hial Rod Laver chuan, "Ka ṭhian, i tana hmun siamah chuan i kir leh ta," tiin Swiss thiampuipa a lawmpui thu a sawi a, major tournament palia champion kim vek tawh Rod Laver hian world number 1 chu Federer tana siam a nih thu a sawi hi ṭawmpuitu an tam.

Number 1 chu
Roger Federer hian Pathianni zan khan Rotterdam Open nomawi a chawi a, ranking lamah a chunga awm Rafael Nadal chu point 155 a khumin number 1 a ni leh ta a, Federer hi hetiang dinhmun luah thei upa ber a ni.

Andre Agassi chuan, "Kum 36 leh ni 195 maw!! Roger Federer chuan tennis tan bung thar duhawm a kai leh ta, i hlawhtlinaah hian ka lawmpui che a, thil ropui dang pawh a la thleng leh ngei ang," a ti. Mipa player bikah chuan Federer hian world number 1 ni thei upa ber Agassi (33years) a khum chiang ta hle a ni.

Mipa tennis thuneitu sang ber Association of Tennis Professionals (ATP) kaihhruaina hnuaiah Federer hi record nei ṭha ber a ni chho zel a, tun dinhmunah amah khing zotu an la awm mai loh avangin record duhawm a hnutchhiah chho zel dawn ni pawhin a lang.

Grand Slam vawi 20 champion tawh Federer chuan, "Kum ruk hnuah number 1 ka ni ve leh ta chu a ni a, ka hun hman tawhah chuan ka tan chawlhkar duhawm ber pakhat a ni," tiin a sawi. Number 1 a nih hnuhnun aṭanga tun hun inkarah hian kum nga leh ni 106 a tla hman a, hei pawh hi record thar tho a ni.

A rei ta
ATP hian kum 1973 aṭang khan world ranking mumal takin an siam tawh a, Pete Sampras khan chawlhkar 286 chhung zet number 1 dinhmun luahin, American hranghlui record hi khum theih loh tur hial a ngaih a ni.

Amaherawhchu, tennis khel tur bika piang Federer a rawn lang a, theih loh anga ngaih kha thil theih a nih zia a rawn lantir chho zel. Federer hi tunkar nena chhiar zawmin chawlhkar 302 zet number 1 a ni tawh a, record hmasa chelhtu Sampras a khum chiang hle–amah hnaih ber tu chu Novak Djokovic (223 weeks) a ni thung.

Tun dinhmunah player ṭha rawn chhuak ṭhin mah se Federer leh Nadal khing zotu an la awm meuh lo a, thawnthu ngaihnawm an ziak chhunzawm zel a nih pawhin a mak lo ang. Boris Becker chuan, "Federer-a'n history a ziak chhunzawm zel..." a ti.

Federer-a'n ropuina leh hmingṭhatna a tawn hi a langsar a, hetiang dinhmun thleng tura a kalkawng erawh a mam vek bik lo hle. Hliam vangin a buai ve fo a, kum 2016 bik phei kha chuan a khup leh hnungzâng na vangin season chawhnu lam zawng a inkhel thei lo tawp a ni.

A kum a tam tawh avangin tournament zawng zawng a khel vek tawh lo a, uluk takin ngaihtuahna a hmang hmasa ṭhin. Federer chuan, "Pa ka ni tawh a, ngaituah tur tam tak ka nei tawh. Tun hma lama ka ngaihdan ang khan inkhel tura ka inpeih a nih chauhin court chhungah ka lut ang," tiin a sawi.