City an dan theih tih fiahtu Will Grigg
FA Cup aṭangin Manchester City an tla a, season khata nomawi pali an beiseina a tawp. Thawhṭanni zana Pep Guardiola hote hnehtu chu Wigan Athletic an ni a, Will Grigg-a'n minute 79-naah goal awmchhun khung. League One club hian quarterfinal-ah Southampton an hmachhawn ang.
Lactics hian 2013 FA Cup final-ah City hi Ben Watson-a tauh luh hmangin an hneh a, a kum lehah intawnglehin quarterfinal-ah 2-1 in an hneh nawn a, tun ṭum hi a vawi thumna a ni. Spanish manager Pep-a finna leh Arab sum pawhin tawp chin a nei a, chu chu football ropuina a ni.
Hneh si, chak si lo
DW Stadium-ah City-in 82.5% zet ball an chang a, goal khung tumin vawi 29 an pet a, chung zinga 17 chu Wigan player ten an dang a, panga dang chu goal zawnah kal mah se goal a lut pakhatmah a awm lo.
Pep-a hote hian inkhel thunun turin vawi 843 zet ball an inpe kual a, hetihlai hian Wigan chuan vawi 184 chauh an in pass thei thung a, kawng engkimah inthlau mah se statistics zawng zawnga pawimawh ber goal-ah League One club an tam zawk.
Lactics hian vawi li chiah goal attempt an nei a, goal zawnah vawi hnih chauh kal mah se hun tawp dawn hnaiha Will Grigg-a goal khung chu chak nan a tawk.
Grigg’s on fire
Euro 2016-a au hla lar ber ang hiala sawi theih chu 'Will Grigg's on Fire' tih a ni a, he hla hi Lactics ṭantu ruhkawl Sean Kennedy-a'n hemi season-a a chet ṭhat avanga a phuah a ni.
Inelna neihna hmun France-ah mipuiin
"Goal a khung leh dawn e
A khung belh zel mai dawn e
Goal a khung leh dawn e
Chu chu kan lakluh chhan a ni
Mei ang maiin Will Grigg a inlar
In tlarhnung hlauin an khur...''
tiin an zai pui dual dual a, Northern Ireland-in last 16 hial thleng mah se Will Grigg hian second khat pawh khel loin bench-ah a ṭhu a, a hla lar zia nemnghettu erawh Lactics striker hi hemi kuma UEFA-in Best player in Europe award dawng thei tur hming a tarchhuah 37 zinga 25-na a ni.
Euro 2016-a zo a, Grigg-a boruak a reh chho mah se a reh hlen lo. Tunah chuan khelmual chhunga chet ṭhat vangin 'Will Grigg's on Fire' a tih leh theih ta. Northern Irish striker hian minute 90 chhungin ball vawi 19 chiah tawk mah se Grigg hian Kyle Waker-a tihsual chu lalutin Aymeric Laporte leh John Stones te tihbuai hmain yard 20 aṭangin goal a khung.
An va inthlau em!
Kum 26 mi Grigg hi Lactis player manto ber a ni a, pound maktaduai 1.3 man chauh a nih laiin amah veng hneh lotu Walker (£45m), Stones (£48m) leh Laporte (£57m) man belhkhawm chu pound maktaduai 150 a tling daih.
Research group CIES Football Observatory-in a zirchiannaah chuan City hi khawvel football club zinga squad manto ber an ni a, League One club hmachhawn tura bul ṭantute man belhkhawm chu pound maktaduai 349 a ni a, a man tlawm ber Fabian Delph pawh pound maktaduai riat man a ni.
Hetihlai hian Wigan player zingah Grigg tih loa man nei awmchhun chu Nathan Byrne niin (£5,31,000) pound maktaduai khat man pawh a ni pha lo. A bak player pakaw zinga pasarih chu a thlawna an lakluh a ni a, a dang pahnih chu an hawh (loan) te an ni a, pound maktaduai hnih man pawh tling lo team-in Premier League champion ni mai tur (?) City an hneh!
An dan theih
Manchester City hian tun season-ah Shakhtar Donetsk chu Champions League group match hnuhnung berah 2-1 in an hneh lo a, hei hi group hmahruaitu an nih chian tawh hnuah a ni. Premier League-ah Liverpool-in Pep Guardiola hote hi an hneh tawh bawk a, amaherawhchu City hi table-ah pakhatnaah awm chhunzawmin an dinhmun a nghing phak lo.
Vawi hnih chak tawh lo City hi dan theih loh ang hiala chhal la ni chhunzawm mah se Wigan-in an hneh loh avanga FA Cup aṭanga an tlak tak hnuah erawh ngaihdan a dang tawh ang. Lactics hian tun season-ah club pasarihin Aston Villa, Shrewsbury, Peterborough, Accrington, Bradford, Southend leh Blackpool ten an hneh tawh lo a, chutichung chuan City-in an hneh thei lo a, hei hian Pep Guardiola hote hi dan theih an ni tih a nemnghet.
Ṭawngṭaina nen
Wigan manager Paul Cook chuan, "Chenna ngai loh ramah kan cheng a, a chang kha chuan kan vannei takzet a ni. Hun tawp lamah kha chuan ka mit ka chhing a, ṭawngṭai mai lo chu tih theih dang a awm lo," tiin awm dan thiam a har thu a sawi.
Cook chuan sawi chhunzawmin, "City nen pawh dun kan nih khan tumahin min be lo a, kan kawng a tawpah a ngaih theih. Keini ang bawkin Southampton pawh an hnual ka ring a, Eithad Stadium-a City tum chu an châk bikin ka ring lo. Tunah chuan thil awm dan a dang ta a, Wembley Stadium thlen nan match khat chiah kan mamawh tawh. League lamah kan rilru pek a ngai a, chutihrualin FA Cup lam pawh kan ngaihthah lo ang," tiin an beisei loh result an neih thu a sawi.
City lam...
City left wing back Delph chuan first half injury time-ah Max Power a tlawh avangin hnawhchhuah a ni a, Premier League club hian player 10-in an khel tluan. Referee Anthony Taylor chuan red card a phawrh hmain yellow card a phawrh zet a, hei hian City player-te a tithinur hle.
Halftime-a dressing room an pan pawhin Pep Guardiola leh Lactics boss Paul Cook te an inhnial buai tih video-ah chiang takin a lang a, Spanish manager pawhin rilru fim a hmang bik lo. Inkhelh banah erawh Pep hian red card chu a awm a tih thu a sawi thung.
Guardiola chuan, "Ka team-te hi an result ni loin an khelh dan aṭangin ka teh a, player 10-a kan khel chung pawhin goal khung tumin kan bei a, an keeper chet ṭhat ni kan tawng a, a nihna takah chuan inelna pali rilrua awm chunga khelh chu a har a ni," tiin an vanduai tih a sawi.
City boss Guardiola chuan, "Liverpool kan hneh tawh lo a, tun ṭumah kan chak lo leh a, hei lo pawh hi kan la chak lo leh ang," tiin a chak reng theih loh thu a sawi a, Wigan a lawmpui thu a sawi a, halftime-ah erawh Cook nena an inkarah engmah a thlen loh thu a sawi thung.
Tun season FA Cup-ah City-in player 16 an chhawr a, match thum an khelhah player ṭha Kyle Walker, Fernandinho, Claudio Bravo, Ilkay Gundogan, Bernardo Silva, Leroy Sane, Kevin De Bruyne leh Sergio Aguero te an inlan vek avangin Barcelona manager hlui Pep-a hian khawvela knockout inelna upa ber hi a ngai pawimawh tih a lang a, chawi tur chuan season thar a nghah leh a ṭul dawn a ni.
Chutihrualin, City hi Premier League champion turin dinhmun ṭha takah an ding tawh a, Champions League-ah Basel chu khualmualah 4-0 a an sawp avangin quarterfinal an thleng tawhah a ngaih theih a, League Cup-ah pawh final thleng tawhin tun Pathianni hian Arsenal nen final an khel ang.