Sevilla mualah Manchester United

Manchester United-in season li chhung UEFA Champions League knockout round an khelh phak loh hnuah zanin dar 1:15 hian last 16 first leg khel turin Sevilla khelmual Ramon Sanchez Pizjuan an tlawh dawn.

United hian Jose Mourinho hnuaia an season hmasa berah an la champion ngai lohna Europa League nomawi a vawi khat nan an chawi. Spanish club Sevilla erawhin he nomawi hi vawi nga an chawi tawh a, United champion hma hian a zawnin vawi thum an champion tawh bawk avangin English club tan hneh an awlsam dawn lo.

Chutihrualin Sevilla hi an coach Unai Emery leh director of football Monchi ten an chhuahsan hnuah ngai an awh lo a, Spanish manager thlaktu Jorge Sampaoli chuan season khat a enkawl hnuah Argentina national team enkawl a thlang. Eduardo Berizzo a rawn lang a, result neih ṭhat loh vangin thla ruk hnuah ban a ni a, December thla aṭangin Vincenzo Montella-a'n a enkawl ṭan.

Italian manager Montella-a'n Spanish club a enkawl hnuah inhliam an tam a, thu lawmawm erawh United hmachhawn turin Ever Banega, Luis Muriel leh Nolito te an dam hman a rinawm. Sevilla hi match hnuhnung pathumah an chak vek a, La Liga-ah pangana ni mekin club top scorer Wissam Ben Yedder a dam ṭha bawk.

United lamin hliam vangin Marcos Rojo leh Phil Jones te an chhawr theih a rinawm lo a, amaherawhchu Eric Bailly a dam leh tawh. Huddersfield Town an hneh ṭuma khel thei lo Paul Pogba pawhin training a zawm tawh a, Alexis Sanchez an neih belh bawk avangin Spain-ah result ṭha neih an tum dawn a ni.