Rawlthar rual zingah Donnarumma hmabak a eng
CIES Football Observatory-in an zirchianna an tihchhuah thar berah AC Milan goalkeeper Gianluigi Donnarumma chu European football-a kum 20 hnuai lam player zingah hmabak nei eng bera ngaih a ni.
Kum 18 mi goalkeeper hian he dinhmun luah tur hian Toulouse keeper Alban Lafont leh Paris St-Germain striker Kylian Mbappe te a khum a, a player khum te ngaihtuahin Italian keeper hmabak en zia ngaihthah rual a ni lo.
Mizote ngaihven Premier League aṭangin top ten-a lang phak player pakhat chiah a awm a, Everton midfielder kum 19 mi Tom Davies chu pasarihna a ni.
Thlan dan
CIES Football Observatory chuan Europe-a league ngaihven hlawh zual 22-a kum 20 hnuai lam player te a zir chiang a, an zirchianna hi season hnih liam taa an chet dan a ni.
Zirchianna chuan, "Player-te kan zirchian hian an khelhna league level san dan leh khelmuala minute an hman zatte chhut a ni a, hei bakah hian an khelhna club chu an league khelh meknaah eng dinhmunah nge an awm tih nen zir vek a ni," an ti.
CIES chuan top 10-a lang chin player chu 'five star' an pek thu an sawi a, heng five star an pek chinte chu, "Europe-a club ṭha ber berah an hming chher tur khawpin an ṭha tawk," tiin an dah sang hle.
Donnarumma bihchianna
Kum 17 leh ni 189 mi a niha Italy tana inlan thei goalkeeper dinhmun lo luah tawhtu goalkeeper Gianluigi Donnarumma hi khawvela rawlthar duhawm hming lam a nihin lam hmaih a ni ngai lo a, CIES-in hmabak nei eng bera an thlang pawh hi thil awm lo a ni lo.
Italy tana vawi li inlan tawh keeper hi 2015-16 season-ah khan AC Milan tan a inlan ṭan a, tun season hi a season thumna a ni chauh chungin Serie A match 93 ngawt a khelh sak tawh a, inelna hrang hrangah Italian club tan hian match 108 a khel tawh bawk.
Donnarumma hian June 2017 khan Milan-a a contract neih lai zo tawh tur chu a pawhsei loh tur thu a sawi a, hei vang hian Milan fans aṭangin beihna a tawk nasa hle. Mahse, a rilru thlakin Milan-ah a cham chhunzawm a, December 30, 2017 khan AC Milan tana match 100 khel tling thei naupang ber record a siam.
Player dang
Donnarumma hnuai chiaha awm Alban Lafont hian Mizo zingah chuan hriat a la hlawh viau lo mai thei–kum 19 mi goalkeeper hi Ligue 1 club Toulouse tan a khel mek a, 2015-ah khan a match hmasa ber khelin Ligue 1-a goalkeeper inlan thei naupang ber dinhmun a lo chelh tawh–hetihlai hian kum 16 leh ni 310-a upa a ni.
Kum 19 mi striker Kylian Mbappe chanchin hrilh nawn kan ngai lo–France tana vawi 10 inlan tawh forward hian tun season-ah PSG tan match 29 khelin goal 15 a khung tling leh der tawh. Palina dinhmun luahtu Christian Pulisic-a'n Borussia Dortmund tan khel mekin kum 19 mi attacking midfielder hi USA nghah fak ber player a ni der tawh.
Pangana dinhmun luahtu Malang Sarr hi kum 19 mi niin Ligue 1 club Nice centre-back rinrawl a ni der tawh a, paruknaa RB Leipzig defender Dayot Upamecano hi Bundesliga-a player 'hot' ber pawl a ni a, pariatna Ajax centre back kum 18 mi Matthijs de Ligt leh pakuana Bayer Leverkusen midfielder Kai Havertz-te hian Europe club lian tan an khel vat a nih pawhin a mak lo ang.
Player langsar
Top 10-a lang phak player zingah Premier League player pakhat chiah a awm a, kum 19 mi Tom Davies a ni. Everton midfielder hian Merseyside club tan tun season-ah ringawt league match 23 a khel tawh a, England tan age level hrang hrangah a inlan tawh bawk.
Top 10-a lang phak chiah Ryan Sessegnon-a'n Championship club Fulham tan a khel mek a, left back nichungin November 2017-ah khan hattrick a siam a, 2014-a Dele Alli hnua English league football-a kum 17 mi hattrick siam leh thei hmasa ber a ni–defender nichungin tun season-ah Fulham tan match 35 a khel tawh a, hattrick a siam.
Leeds United midfielder beiseiawm Ronaldo Vieira chu 20-na a ni a, Liverpool defender Trent Alexander-Arnold chu 41-naah a awm ve bawk. Real Madrid aṭanga SC Heerenveen-a loan-a khel mek Martin Odegaard chu 28-na a ni a, Dutch legend Patrick Kluivert fapa Justin Kluivert chu 16-naah a lang bawk.