Season khat tawp hneh loh tawng lo ‘Arsenal Invincibles’

Premier League-ah Manchester United-in nomawi vawi 13 an chawi tawh a, Manchester City-in nomawi chawi turin point 100 an hmu tling. Jose Mourinho enkawl Chelsea-in record duhawm tak tak an rawn siam a, amaherawhchu Arsenal chuan Arsene Wenger-a kaihhruainain 2003-04 season khan hneh loh tawng loin an champion.

Thierry Henry, Patrick Vieira, Dennis Bergkamp, Fredrik Ljungberg leh Jens Lehmann te awmna team kha Premier League team awm tawha ropui ber a ni em tih erawh inhnialna a awm thei a, chutihrualin football ngainatute chuan team ropui tak an ni tih an pawm thlap ang.

Tun season-a Liverpool-in match 25 an khelh tawhah hneh loh an la tawng lo a, Arsenal record duhawm result ṭha zawk nena nihrual turin match 13 la awm mah se Wenger-a leh a naute record ropui a nghing. Gunners ṭantuten an inchhuanna ber 'Invincibles' ti ve thei awm se an duh lo a, tun ṭumah hian Arsenal chanchin an sawi apianga hmaih thiang lo kum 15 liam taa thil thleng kha kan thlir kir dawn a ni.

Arsenal-in George Graham hnuaiah game mawi hmu tawk loah an inngai a, attacking game duhin thlak danglam an duh. Club thuneituten Bruce Rioch chu manager atan an la a, season khat bak a daih lo.

Nagoya Grampus Eight enkawltu Arsene Wenger an lalut a, Japanese club aṭanga lakluh a nih avangin dan san a har. Chutihrualin French manager hian an club 

ṭha Nancy leh Monaco a enkawl tawh a, star player enkawl dan kawngah tawnhriat a nei tawh avangin dah hniam theih erawh a ni lo. 

Wenger hian mi bik a nih zia Premier League-ah a rawn pholang a, kalphung thar duangin ei leh in bakah player-te khawsak dan thlengin a thlak danglam. Hetih hunlaia zu ngawl vei Tony Adams pawh a nun thlak danglamin 1997-98 leh 2001-02 ah te Premier League leh FA Cup-ah an champion.

Premier League-in khawvela league ngainat hlawh ber a nih theih nan Wenger a pawimawh a, Sir Alex Ferguson nena khelmual chhung leh pawna an inbeihna chu khawvelin ngaihnawm a ti. Scottish manager Alex pawhin Wenger hnen aṭanga thil tam tak a zir thu hi a zep lo a, an pahnih hian an inti chak tawn a ni.

Arsenal hian kum 2002-a Premier League nomawi an chawi hian Manchester United an hneh a, Preston record nih rualin season khat chhungin khualmualah chak loh an nei lo. Independent ziaktu Tim Rich chuan hemi ṭuma Arsenal team hi 'Invincibles' tihin a ziak a, hemi aia team ropui tur Wenger-a'n a din mek tih erawh a hre tel kher lo ang.

Sir Alex Ferguson hnuaiah Manchester United-in 2002-03 seaon-ah Premier League nomawi an rawn chawi a, hemi ṭum pawh hian nomawi inchuha United leh Gunners inum chu season tawp lam thlengin a ngaihnawm.

ṭan hmain Philippe Senderos, Jens Lehmann, Johan Djourou, Gael Clichy, Cesc Fabregas leh Jose Antonio Reyes te an lalut. Wenger hian player-te hian hma thlir thui tak a neih avangin player talent nei ṭha hi a la khawm a, 2003-04 season-ah erawh pound maktaduai 1.5 man Lehmann leh pound maktaduai 10.5 man Reyes te chiahin hmun pawimawh an chang.

Arsenal khan 2003-4 season khan match 38-ah vawi 26 chakin vawi 12 an inhnehtawk a, chak loh an nei lo. An formation hman ber chu 4-4-2 a tih theih a, 4-2-3-1 tiin an sawi theih bawk. Dutch player Dennis Bergkamp chu midfield leh forward thlunzawm nan an hmang a, number 10 role a chelh ṭhin.

Chutihrualin player pakhat thlanchhuah tur a nih chuan Thierry Henry hming a ri ring khawp ang. French forward hi Ballon d'Or-ah kum 2003 khan pahnihna a ni a, 2004-ah palina a ni leh bawk. 

French manager team dinah hian French player an langsar a, Henry bakah hian Robert Pires leh Sylvain Wiltord te chu an goal nawrna ber pakhat a ni a. Captain Patrick Vieira-a'n midfield a thunun hneh zia te, Freddie Ljungberg hmuhnawmzia te chu sawi hmaih a thiang lo. 

Arsene Wenger sawi rik apiangin a player lak thiamzia sawi lan a ni ṭhin a, Invincibles team-ah defender pawimawh Kolo Toure kha £150,000 man chauh a ni a, Ljungberg lah pound maktaduai thum chauh a ni.

Liverpool-in Arsenal record nih rualin hneh loh nei loin an champion ve a nih pawhin Gunners chanchin erawh theihngilh theih a ni dawn lo. Highbury-a Gilberto Silva, Viera, Pires, Ljungberg, Bergkamp leh Henry te attacking mawi fahran te, tlarhnung lama Sol Campbell, Kolo Toure, Ashley Cole, Lauren leh Jens Lehmann te ding khawng tlatte chu football chanchinah a aia hmuhnawm a zawm tawh chuang 

lo ang.