Bayern lakah Besiktas an zawr

Champions League quarterfinal-ah a zawnin season sarih chhung Bayern Munich kan hmu ngei dawn niin a lang ta. German champion hian Besiktas 5-0 in an sawp a, Jupp Heynckes-a naute hian a zawna match 14 chhung hnehna changin an club chak tluan rei ber record an nihrual.

Thawhlehni zan last 16 inkhelah Bayern Munich tan Thomas Muller leh Robert Lewandowski ten goal hnih an khung a, European champion vawi nga ni tawh tan hian Kingsley Coman-a'n goal khat dang a thawh ve bawk–Besiktas defender Domagoj Vida chu minute 16-na lekah hnawhchhuah a ni.

March 14 hian Istanbul-ah second leg khelh leh tur a ni a, player uaithla lam tawh tamna Besiktas tan Bayern lehthal a awlsam tawh lo ang. Besiktas player 11 inkhel bul ṭantute kha chawhrualin kum 31 leh ni 151-a upa an ni a, Champions League-a an inlan upat ber ṭum a ni hial.

Five Star Bayern
Turkish club Besiktas-in group stage an hmang ṭha a, khualmuala an match hnuhnung pathumah hnehna an chang thei. Allianz Arena-ah pawh an tlangnel nghal, forward Vagner Love-a'n goal bar chungah teuh takin a thlawh chhuak a; midfielder Ricardo Quaresma pawhin Bayern keeper Sven Ulreich tan hna hautak a siamsak zui zat bawk.

Amaherawhchu, minute 16-na lekah Vida chu Lewandowski a tihtluk avangin hnawhchhuah a ni. Kum 35 mi Atiba Hutchinson ball pek fuh lo umtu Vida hian Bayern striker lakah ball hloh a duh lo a, box pawn chiahah Poland international hi a ti tlu a, refree-in red card a phawrh nghal–mikhual team tan beisei tur a awm zui tawh lo.

Player pakhata tam zawk Bayern lamin inkhel an thunun a, chawlhlawk hma hretin a awmna tur hmun dik taka awm fuh Muller chuan Besiktas keeper Fabri dan theih lohin a khung. Germany international hian Champions League knock out stage chinah season riat chhung goal a khung ta.

Lewandowski-a'n freekick aṭanga goal ban a pet per hnuah, Poland captain hian Coman goal khung tur a siamsak zui. Defender Joshua Kimmich ball cross tawih zet chu Muller-a'n a thai lut leh a, Bayern goal hnuhnung pahnih erawh Mats Hummels leh Muller te thawhrah sengtu Lewandowski khung a ni.

Bayern Munich tlarhma an che rangin an hmuhnawm a, kartawp Bundesliga-a goal khungtu pathum Lewandowski, Coman leh Muller ten goal an neih leh ṭheuh bakah assist vawi hnih an nei bawk. Khaw vawt tak hnuaia inkhelah David Alaba leh Joshua Kimmich te tlarhnungah an dingkhawng tluan thei.

Hneh theih loh
Jupp Heynckes-a'n Champions League bikah a naute match 10 chhung hnehna a chan zawn pui thei ta a, ani bakah chuan khawvel manager zingah Louis van Gaal leh Carlo Ancelotti chiah hetiang record siam thei hi an la awm.

Kum 72 mi Heynckes-a'n 2012-13 season khan nomawi lian pathum chawi chungin Beyern enkawl hna hi a chawlhsan a, mahse Bayern hian nikum kum tawp lam khan an kokir.

German manager Heynckes a awm hnuah Bayern an insiamṭha nghal a, group match bikah Celtic vawi hnih an hneh bakah Anderlecht leh Paris Saint-Germain an hneh bawk a, tunah Besiktas an sawisa chhunzawm leh bawk.

Bayern Munich-in Champions League nomawi an chawi hnuhnun ber ṭum khan quarterfinal china an match pangaah hnehna an chang vek a, Juventus, Barcelona leh Borussia Dortmund te lakah goal 13 khungin anmahni lamah goal khat chiah a lut! Heynckes kaihhruaina hnuaia an ropuina ang an tawng leh a nih pawhin a mak lo ang.

Heynckes chuan, "Champions League a nih tawh chuan eng team tan pawh player 10 ni chunga khelh chu a awlsam ngai lo, Besiktas kha team ṭha tak an ni a, kan tlang chiang tihna a la ni bik lo. Khualmualah chuan hlauh nei miah loin min nawr dawn a, a inven dan kan zir a ngai ang. Chutihrualin goal nga kan neih tawh avangin inrintawkna kan nei sang ve bawk dawn a ni," a ti.