Stamford Bridge a la 'ding' reng e
February 20, Vanglaini chhuaka kan zawhna chu 'Barca-in Stamford Bridge an zawh chim dawn em?' tih a ni a, a chhanna pekin kan awm ta - Barcelona hmaah Stamford Bridge a nghing duh lo a, Barca leh Chelsea 1-1 in an inhnehtawk.
Nilaini zan Champions League last 16 first leg-ah Chelsea-in Barcelona an mikhual a, Blues tan Willian-a'n goal hmahruai a khung hnuah Catalan club-in Lionel Messi hmangin an sut.
Premier League champion-in khel ṭha zawk mah se khualmuala goal khungtu Barca chu dinhmun ṭha zawk an ni a, March 14-ah Nou Camp-ah team pahnih hi an intawng leh ang.
The Master Plan
Chelsea boss Antonio Conte-a'n Barcelona hneh turin 'plan' danglam bik an mamawh tih a hria a, a naute theihna a hrechiang - Italian manager hian Eden Hazard chu false nine angin a chhawr a, Blues player ten Lionel Messi, Luis Suarez leh Andres Iniesta te ball an chan apiangin an hnaih chilh zung zung bawk.
Willian chu Chelsea tana player langsar a ni a, hei hi a nih dan tura Conte duan a ni bawk - Brazilian forward hian box pawn aṭanga ball pet a thiam tih hriain Blues player ten hnaihchilh taka Catalan club tlarhnung ṭhiah tum aiin box pawna Willian hmun awl pek a fuh tih an hria.
Blues-in minute 62-naah an ruahmanna an hlawhtlinpui ta ngei a, box pawn aṭangin Willian-a'n Chelsea tan goal hmahruai a khung - hei mai hi a ni lo, Brazil international hian vawi hnih ngawt post a pet per bawk a, Barcelona an vannei. Conte chuan, "Box-to-box a Barca hnaih tum chu a atthlak a, 6-0 thlenga tlawm theihna a ni," tiin a ruahmanna a sawifiah.
Hei le Messi
Chelsea-in hun rei zawk 'world class' striker Messi leh Suarez an dah 'nil' thei a, kan hmuh ṭhin team hmuhnawm Barca kan hmu thei lo. Mahse, minute 75-naah erawh Blues an chesual zeuh a, Barca ang team ṭha laka vawi khat chetsual pawi zia an tem.
Andreas Christensen ball pass sual nang fuhtu Iniesta-a'n Messi hnenah ball a pe a, Argentine forward tan London club goal net tawn puar tir turin harsatna a awm lo - Chelsea fan-ten inchhuang taka, "Messi-a'n Blues lakah a la pet goal ngai lo," an tih ṭhin chu thai chhiatin a awm ta a, Messi tan Chelsea a hmachhawn vawi kuaa a goal hmasa ber a ni.
Chelsea boss Conte-a'n Barcelona dan theih dan tur a ngaihtuahna lamah mut pawh a mu mumal lo niin a sawi a, an vawi khat tihsual zeuh tih lohah chuan Chelsea-in fak an phu - hei hi Stamford Bridge-a fan-te pawhin an hriatpui a, kut beng chungin an player-te an thlah liam.
A la tawp lo
Barcelona manager Ernesto Valverde chuan, "Willian kha hmun awl kan pe hnem mah mah a, an ball pek a fuh em em a, a goal shot lah chuti bawk a ni. Blues kha an result vangin an lawm ngeiin ka ring a, minti buai hneh em em a ni"
"Mahse, Nou Camp-a inkhel leh tur kan nih avangin engkim kan la thlak danglam thei tih ka hria. Khualmualah goal kan khung a, kha goal kha inkhel tihtawpna ni lo mah se beiseina erawh kan la neih zel phah a ni," tiin quarterfinal luh ngei a inbeisei.
Chelsea-in Stamford Bridge-a an khelh dan anga an khel leh a nih ngat chuan Barca tan tlang chiang saa indah ngawt erawh a fuh bik kher lo ang - thawnthu hlui keu let pawhin Blues hian Barca an hneh thei tih an lo pholang tawh a, 2012 Champions League-a nomawi an chawina kawngah khan semifinal-a an hneh chu Barca an ni.