Chelsea-in theihna kan nei - Conte

Antonio Conte chuan Cham­pions League aṭanga Barcelona hnawt chhuak turin thil danglam thlen tir an tum thu a sawi. Italian manager chuan, "Nou Camp-ah thlil ropui thlen tir turin kan inbuatsaih dawn. Mi mawl kan ni lo a, fing taka game kan khelh a ngai dawn a ni," a ti.

Hnehna chang thei dinhmuna Chelsea an din zanah Christensen tihsual vangin Blues-in draw result an neih phah a, kum 21 mi defender lakah Conte a ṭuan duh lo.

Juventus boss hlui chuan a player hi chhan tlatin, "Player naupang tak a ni a, hetianga game boruak sangah puitling leh rilru huaisen tak pu chungin a khel thei a, zaninah khan player khel ṭha ber zinga mi a ni," a ti.

Blues boss chuan sawi zawmin, "Game duhthusam kan khel chhuak ṭep a, mahse Messi, Iniesta leh Suarez te awmna team laka vawi khat tihsual pawizia kan tem," a ti a, second leg thlir lawkin, "A awlsam dawn lo," a ti bawk.

Conte chuan a nihna taka thil thlir a ṭul thu sawi nghalin, "Vawi­ina team kan sawi hi Barcelona an ni a, duhthusam sawi theih a ni lo. Team ṭha leh thiam bik an nihzia an pholang tawh. Mahse, kan tlarhnung kan rem phui thei tih kan pholang tawh a, chance kan insiam thei tih kan tarlang bawk," tiin Barca a hlau lo.