MFA Cup : Group hmahruaitu an chak lo

MFA Cup vawi 18-na semifinal chu nimin khan GSA Playground, Mamit-ah khelh a ni a, group stage-a hmahruaitu pahnih Champhai DFA Academy leh Aizawl FC Academy ten an khingpui Project FC leh Kawrtethawveng FC te an hneh lo.

Bung tharKolasib club hlun Pro­ject FC leh inelna thlentu Mamit club Kawr­tethawveng FC ten Zirtawpni chawhnu dar 1:00 hian final an khel dawn. MFA Cup vawi 17 khelh tawhah Kolasib leh Mamit district club an la champion ngai lo a, hei vang hian kumin final hi a hlu sawt ang.

Semifinal chu
Nimin semifinal hmasa zawkah Project FC tan Laldinmawia'n minute thumna lekah a khung nghal a, CDFA Academy-in Lallawmsanga hmangin minute 12-naah sut nghal mah se Kolasib club tan Lalremruata'n minute 47-naah chakna goal a khung.

Semifinal hnuhnung zawkah Kawrtethawveng FC-in first half hun pek belhah Lalrammuanpuia hmangin goal an khung a, Aizawl FC Junior-in an sut thei lo a, Mamit club-in final an lut.

Final kalkawng
Project FC hian an match hmasa berah Ai­zawl FC chu goal awm loin an draw a, an match hnihnaah New Serchhip chu Lalbiakkima goal hmangin 1-0 in an hneh.

Kolasib club hian tun inelnaah match thum khel tawhin goal thum an khung tawh a, goal hnih an khung tawh a, chak loh an la nei lo.

Kawrtethawveng FC hian an match hmasa berah Siaha United FC chu 3-1 in an sawp a, amaherawhchu match hnihnaah CDFA Academy lakah 0-3 in an chak lo. Match thumnaah pawh Mamit club hian Bazar Veng chu 2-2 in inhnehtawk pui mah se semifinal an lut tho a, knockout stage chinah inelna thlengtu an nihna langin final an inpet kai.