Arsenal tan last 16 luh zan?

Europa League last 16 lut turin Arsenal tan hna harsa a awm tawh lo, an goal venhim a tawk. Zanin dar 1:15 hian Emirtaes Stadium-ah Gunners hian Ostersunds FK an mikhual dawn, an intawn hmasakin si thum faiin hnehna an chang tawh a ni.

Champions League aṭanga tla Atletico Madrid (4-1) leh Borussia Dortmund (3-2) ten first leg-ah hnehna an chan tawh avangin an kawng a awlsam tawh dawn bawk. Amaherawhchu, Napoli erawh RB Leipzig lakah 3-1 ngawta an tlawm tawh avangin hnehna chan a beisei awm tawh loh hle–Serie A hmahruaitu hian last 16 lut tur chuan thil mak an thlentir a ngai tawh ang.

Indahṭhat hun
Arsene Wenger-a'n group stage lama a tih loh dan ang takin knock out stage chinah player langsar a hmang, si thum faia hma an hruai tawh avangin player dahṭhatna hun ṭha a ni ang.

Gunners hi Pathianni zanah League Cup final khel turin Manchester City an hmachhawn dawn a, March 1 zanah Man City nen vek hian Premier League an khel zui leh dawn bawk–Wenger tan squad siksawina hun a ni.

Lyon aṭang an lakluh Alexandre Lacazette chu khup hliam vangin an la chhawr thei dawn lo a, Europa League lamah Dortmund an la awm ve bawk avangin Pierre-Emerick Aubameyang chhawr theih a ni lo bawk. Tlarhma a chhawr atan Danny Welbeck a inpeih thung.

Ostersunds lam hian an player thar Smajl Suljevic leh midfielder Johan Bertilsson te an la chhawr thei dawn bik lo a, player dang erawh an intawn hmasak ṭuma a ngai an ni leh ang.

UCL kalkawng
Arsenal hi tun hnaiah Champions League ticket neih nan Premier League-ah palina an ni ṭhin a, season hmasa erawh kha chuan pangana an nih avangin an inlan phak tawh lo.

Season kal laiah pawh Man City, Manchester United, Tottenham, Liverpool leh Chelsea te an tluk lo mek a, palina nih a awlsam dawn lo. Wenger-a naute tana kalkawng awlsam zawk nia lang chu Europa League nomawi chawi hi a ni.

Arsenal player hlui Robert Pires chuan, "Gunners hian UCL khel ngei se ka duh, chutihrualin league-a palina nih hi a harsa tawh dawn. Season hmasa lama United-in an tih ang khan Europa League nomawi chawi mai hi a fuh zawk dawn niin a lang," a ti.

Napoli an ral?
Maurizio Sarri kaihhruaina hnuaiah Napoli-in season duhawm an hmang a, mah se Manchester City leh Besiktas an tluk loh avangin Champions League last 16 an lut phak lo.

Italian club hi Europa League lamah chuan team langsar ni phak tura ngaih an ni. Mahse, Juventus chunga awm Serie A hmahruaitu Napoli hi Leipzig lakah 3-1 in an mualpho a, zanin an inkhelhna tur hi Germany a nih tawh avangin beisei a chau tawh hle–Bundesliga table-a pangana hi rinkai zawk an ni.