Bengaluru-in AFC Cup group stage an thleng

22nd February, 2018

Bengaluru FC-in Asia khawmualpuia club football inelna sang ber dawttu AFC Cup an khel dawn–Nilaini zan khan Bangalore club hian TC Sports chu playoff second leg-ah 5-0 in an sawp.

Indian Super League hmahruaitu club hian TC Sports hi Maldives-a an intawn hmasak zawkah 3-2 in an lo hneh tawh a, inkhel hmasa nen belhkhawma an chakna zat chu 8-2 a ni.

Goal nga
South Indian club tan Leganes striker hlui Antonio Dovale chuan hattrick (12', 35', 48') a siam a, Erik Paartalu (36') leh Rahul Bheke (90')ten goal khat ve ve an khung bawk.

Bengaluru tan goalkeeper Lalthuammawia Ralte, defender Zohmingliana Ralte leh midfielder Malsawmzuala ten inkhel bul an ṭan vek a, striker Daniel Lalhlimpuia chu second half-ah tlan luhtir a ni bawk.

Bengaluru zinkawng
Indian club zingah Asian football-ah Bengaluru FC an thleng sang ber a, 2015-16 season khan Indian club zinga a hmasa ber ni turin AFC Cup final an lut. Nikumah AFC Cup kalphung thlak danglam a ni a, Interzonal final an lut–hei hi semifinal tlukpui a ni.

Bengaluru hian Federation Cup nomawi an chawi avangin preliminary round aṭangin AFC Cup hi an khel ṭan a, Transport United chu inkhel pahnih belhkhawmah 3-0 in an hneh–he inkhelah hian Mizo tlangval Daniel-a'n goal khat a khung.

South Indian club-in AFC Cup an khelh dawn takah chuan Group E-ah I League champion Aizawl FC nen an awm dawn a, anni bakah hian Maldives club New Radiant leh Bangladeshi club ṭha Dhaka Abahani an awm bawk–group hmahruaitu chiahin knockout round an lut dawn.

Kalphung danglam
Nikum AFC Cup aṭangin kalphung her danglam a ni a, Asia ram club football inelna sang ber dawttu hi West Asia Zone, ASEAN Zone, Central Asia Zone, East Asia Zone leh South Asia Zone-ah ṭhen hran an ni.

India hi South Asia Zone-ah an awm a, hei vang hian ram pakhat club Aizawl FC leh Bengaluru FC an awmdun theih phah. Group hmahruaitu hi Inter-Zonal playoff semifinal-ah an lut dawn.

Group stage zawh inelna hi zonal semifinals, zonal finals, inter-zonal semifinals leh inter-zonal playoff final-ah te ṭhen hran a ni. Aizawl FC-in knockout round an luha an chak chuan inter-zone playoff final an khel leh ang–hei hi semifinal tlukpui a ni a, an chak chuan final an lut thei dawn tihna a ni.