Bul ṭan fuh Raonic

World number 3 hlui Milos Raonic chuan tun season-a a match hmasa berah hnehna a chang. Canadian tlangval hian Thawhlehni zan khan Taro Daniel chu 6-1, 7-5 in a hneh a, harsa lutuk loin Delray Beach Open first round a paltlang.

Kum 27 mi Raonic hi season hmasa khan hliam vangin a buai hle a, tun hnai thla ruk chhungin ATP Tour level-ah vawi hnih a inlanna chiah a ni. Nikum Delray Beach Open-ah kha chuan Raonic hi world number 4 ni chungin a inlan a, kuminah erawh number 32 a ni tawh thung.

Seeded pakuana Raonic chuan, "Ka tan chuan ni dang zawng aiin hnehna chan hi a lawmawm hle, match lehpekah chuan tuna aia ṭha zawk hian ka khelh theih pawh ka beisei. Nitin hian zawi muangin hma ka sawn ve zel a, taksa leh rilru lamah hmasawnna tur ka la ngah hle," tiin a sawi.

Raonic hian a match lehpekah chuan American tlangval Steve Johnson a hmachhawn leh ang, Johnson hian darkar khat leh minute 11 chhungin Georgian Nikoloz Basilashvili chu 6-3, 6-4 in a hneh ve bawk a ni.

Inkhel dangah Denis Shapovalov chuan ATP tournament vawi riat champion tawh Ivo Karlovic chu 7-5, 7-6 (6/4) in a hneh. Seeded parukna John Isner leh Peter Gojowczyk te pawhin an match hmasa berah hnehna an chang bawk.