Foreigner awm lo hi kan tan a ṭha zawk - Edmund

India rama rawlthar ṭha rual dah khawmna Indian Arrows chuan Zirtawpni tlai dar 2:00 hian RG Stadium, Mualpuiah Aizawl FC an hmachhawn dawn a, nimin khan Aizawl an rawn thleng.

FIFA Under 17 World Cup-a India kaihruaitu coach Luis Norton de Matos-a enkawl Indian Arrows-ah Edmund Lalrindika leh Lalengmawia (Apuia) te an tel a, Mizo rawlthar pahnih hi Mizo club hmachhawn turin an rawn zin ve ve.

Indian Arrows hian match 16 an khelh tawh aṭangin point 15 an hmu a, table mawngphahah an awm mek. I League club dang zawngin foreigner paruk an lak theih laiin Matos-a hote erawh Indian hlangin an khel a, hei hi an result ṭhat lohna chhan pakhat a ni.

Lunglei rawlthar Edmund-a chuan, "Foreigner pahnih emaw pathum chu nei ila kan harsatna tam tak hi a zia ngei ang. Amaherawhchu result aia hmasawnna kan ngai pawimawh a nih chuan Indian hlanga kan khelh a ngai a, foreigner awm lo hi kan tan a ṭha zawk a ni," tiin Vanglaini a hrilh.

Edmund-a hian Goa-a Aizawl FC an mikhual ṭumin I League-a a goal hmasa ber a khung a, Mizo club nen hian 2-2 in an inhnehtawk. Goal a khung tlem chhan sawi zuiin, "Kan khingpuite tawnhriat nei ṭha tak tak an ni a, naupang rual lakkhawm kan nih avangin tawnhriat kan neih tlemna a lang a, goal venhim hna kan thawh tam avangin goal khung tam a harsa bawk. Goal khung tam turin zir belh tur tam tak ka nei tih a lang a, Pathian zarah ka dam ang a, theihtawp ka chhuah zel ang," tiin a sawi.

World Cup khel player-te a hmuh dan sawiin Edmund-a chuan, "World Cup Under 17 player-te han danglam lutukna ka hre lo. World Cup khel tura an training nasat avang te, ram danga an zinchhuah tam avang te leh World Cup hial an khelh avangin hma chu an sawn a, inrintawkna pawh an ngah a, an kum ngaihtuah chuan ṭha khawp mai," a ti.

Mizo rawlthar Edmund-a hi kum lama a upat hret avangin FIFA Under 17 World Cup a khel ve lo a, chutichung chuan I League-ah Matos-a hnuaiah hmun pawimawh a chang a, Aizawl FC an hmachhawn hunah pawh bul a ṭan ngei beisei a ni.