Zaninah MSL4 semifinal khel tur hriat dawn : Tuikual South Vs Republic VR4
Mizoram Super League season linaah a vawrtawp a thleng chho a, zanin dar 7:30 hian Tuikual South leh Republic VR4 te Hawla Indoor Stadium, Republic Vengthlangah an inkhel dawn.
Zanin hian MSL4 semifinal khel tur a hriat dawn. Thawhlehni zanah Tuikual South-in 74-70 in Khatla TBL hneh mah se MSL vawi hnih champion tawh Khatla chuan Zarkawt BCA leh Mission Veng Vikings hnung zuiin semifinal an lut a, hmunruak pakhat la awm hi Republic VR4 leh Tuikual South ten an inchuh ang.
TBL an vannei!
Khatla TBL-in an league match hnuhnung berah Tuikual South an hmachhawn a, bul ṭan ṭha lo mah se third quarter-a an chet ṭhat avangin tho chhuak thei dinhmunah an ding hman a, amaherawhchu an tawnhriat neih ṭhatna hmang turin an fitness a ṭha lo a, hun tawpah chak phu zawk TKS-in 74-70 in hnehna an chang.
TBL hian chak hmel hmu lo mah se Republic VR4 nen hun tawpa an beih hram rah an seng a, a chhe berah palina an nih chian tawh avangin semifinal an lut.
Phengphehlep a mawi
Tuikual South tan captain F. Zodinthara chuan Khatla TBL an hneh ṭumin point 25 a nei a, danglamna thlentu a la ni reng a, anni bakah hian tawnhriat nei ṭha Lalmuanpuia Zote leh theihna nei sang Lalnunpuia Renthlei te zanin inkhelah an pawimawh ang.
MSL season thum khelh tawhah Tuikual South danglamna ṭhin chu an veng mipui an ni ṭhin a, tun season-ah erawh an la tam tawk lo. Result ṭha an neih chhunzawm nawn zanina Republic VR4 nena an inkhelh hunah an hla pui 'Phengphehlep ṭial mawite' sa mawi tham mipui an punkhawm a ṭul dawn a ni.
Theihna a awm
Republic VR4-in Khatla TBL an hneh loh ṭumin hun tam zawk hma an hruai thei a, an khelh ṭhat niah chuan eng team pawh hneh thei an ni. MSL kaithar hian relegation playoff leh semifinal inkarah Tuikual South chauh a awm tih an hmuh thiam a nih chuan hun tawp thlengin an theihna zawng zawng an chhuah thei ang.
Republic Vengin an match hmasa pahnihah ṭawiawmtu an nei ṭha a, match hnuhnung pahnihah vengchhungah chhiattawk an awm avangin ṭantu an ngah tawk lo a, zanina Tuikual South nen an inkhelh hunah erawh an tam leh tawh ang. VR4 player ṭhatna aṭanga thlir chuan Tuikual South hneh turin an ṭha tawk lo a, amaherawhchu mipui puihna nen chuan semifinal kawng a la inhawng.