Number 1 nih leh duh Muguruza

World number 1 ni ve zuai tawh Garbine Muguruza chuan a chung bera awm leh chu a thil tum lian tak a nih thu a sawi. Spanish nula hi tunkar chhunga khelh Dubai Duty Free Championship-ah a inlan dawn a ni.

Season hmasa khan Muguruza hian Wimbledon nomawi a chawi a, nikum favang lai khan hun rei lote chhung chu world ranking-ah pakhatna a ni ve hman. Mahse, a khelh ṭhat tluan rei loh avangin a dinhmun a che sawn reng a, tunah hian number 3 a ni mek.

Kum 24 mi Muguruza chuan, "A chung bera awm chu duhthusam a ni a, engtik niah emaw chuan ka kir leh ngei ang tiin ka ngaihtuah ṭhin. A awlsam dawn lo tih chu ka hria, mah se ka tum ram thleng tur chuan ka bei leh dawn a ni," tiin a sawi.

Nau neih vanga Serena Williams a chawlh chhungin hmeichhe number 1 ni rei thei an awm lo a, season hmasa chhung khan player panga ngawtin he dinhmun hi an chelh hman–Muguruza hian a khel ṭha tluang a nih chuan French Open hmain a chung berah awm theihna hun a la nei ang.