Nagelsmann leh Bayern-in Supercup nomawi an chawi

Bayern Munich-in Thawhlehni zan khan DFL Supercup-ah Borussia Dortmund 3-1 in an hneh. Bavarians manager Julian Nagelsmann-a'n mellung thar a phun a, a football career-a nomawi hmasa ber niin nomawi dang a la chawi zel ang.

Signal Iduna Park-a inkhel hmuhnawm bikah Bayern tan Robert Lewandowksi-a'n goal hnih a khung a, Thomas Muller-a'n goal khat belh bawkin Dortmund tana beiseina siamtu Marco Reus-a goal-in result a ti danglam thei lo.

A awlsam lo
Bayern-in German football an thunun a, chutihrualin Supercup-a hnehna chan hi a awlsam lo. Tun ṭum hi Bavarians-in a zawn zata Supercup vawi 10 an khelhna a ni a, heng zinga vawi liah hian chak lo.

Supercup hi DFB Pokal champion-te khelmualah khelh a ni ṭhin a ni a, Bayern hi Signal Iduna Park-ah hian tun hnai kum 10 chhungin vawi thum an chak lo.

Bavarians hian manager thar Nagelsmann hnuaiah season bul an ṭan ṭha lo a, friendly match vawi li an khelhah vawi khatmah chak an neih loh bakah league match hmasa berah Borussia Monchengladbach nen an inhnehtawk.

Football hmuhnawm
Supercup hi friendly match ang leka ngaitu an awm a ni thei a, Bayern leh Dortmund erawhin an theihna zawng zawngin an khel tlawm an duh lo. Red card leh penalty a awm lo chungin football hmuhnawm bika chhiar tel theih a ni a, inkhel a rorum bakah goal li zet a lut.

Khawvel striker ṭha ber ni lai Robert Lewandowski-a'n minute 42-naah goal hmahruai a tauh goal. Polish striker hian vei lam aṭanga Serge Gnabry cross chu ṭha taka tlan lutin a tauh lut a, striker ṭha bik a nih miau avangin Dortmund tlarhnung tan ven a har a ni.

Second half-ah Nagelsmann hnuaia khel Bayern-in passing mawi an lantir a, vei lam aṭanga Alphonso Davies cross chu Lewy-a'n a dummy hnuah Thomas Muller-a'n chiang zetin minute 50-naah a khung.

Dortmund beiseina siam turin Jude Bellingham-a pass chu minute 64-naah Marco Reus-a'n box pawn chiah aṭangin kawh zetin goal kilah a pet kual lut a, keeper Manuel Neuer dem theih a ni lo.

Bayern an vannei zui a, minute 74-naah Dortmund defender Manuel Akanji ball pet chhuah chu substitute Corentino Tolisso-a'n dang hmain, a per chu Lewy zawnah chiah a tla. Bayern striker hian keeper a hmachhawn tawh avangin harsatna nei loin goal-ah a chantir.

Inkhel rorum
European football-a hmuh zen zen loh football rorum chhawpchhuah a ni a, inhliam an pawisa lo a ang ber. Niklas Sule-a'n ball tel loa Erling Haaland a tlawh te, Marco Reus-a'n Bayern defender Dayot Upamecano a tlawh bakah Haaland-a'n Neuer-a ball pet chhuak tur a tlawh te chu vanduai palha na taka inhliam theihna vek a ni.

Dortmund hi Bayern elpha ber an ni bawk a, khelmualah tlawm zawk nih an tum lo. Ṭhian chhan pe na Joshua Kimmich leh Dortmund captain Reus te inchhan danah kut thawh mai an hreh lo ni tein a lang, heng zawng zawng hi German Clasico (Der Klassiker) hlutna belhchhahtuah a ngaih theih.

Bayern tlarhnung
Bayern-in Nagelsmann-a hnuaiah harsatna an tawk dawn niin lang a, amaherawhchu Dortmund nena an khelh dan thlirin champion nomawi humhim turin an la ṭha tawk tih a lang.

Bavarians hian tlarhnung siam ṭhat an la mamawh a, Sule leh Upamecano te inkawp chu Haaland hoten an ti nghing nasa hle. Chutihrualin David Alaba chhuahsan Bayern tlarhnung hian hliam vangin France international defender pahnih Lucas Hernandez leh Benjamin Pavard te an chhawr lo tih hriat a ṭha.

Hei bakah hian kum 35 mi Neuer-a la rinlak reng a, goal la lut hmaa Dortmund captain Reus-a goal khung tur a dang te chuan team innghahna a la nihzia a pholang. Bayern tlarhma erawh Lewy a awm miau a, an ngaih-tuahawm loh.

Sancho an ngai lo
Borussia Dortmund-in Jadon Sancho an chhuah a, English winger hmunruak hi hnawhkhah an harsat dawn lo. Bayern lakah hian Dortmund goal bawh a na a, kum 16 mi Youssoufa Moukoko a hmuhnawm a, offside vangin a goal khung pawm a ni lo.

Erling Haaland ṭhatzia sawi nawn a ngai tawh lo a, Norwegian striker hi a thiamna tel loin a chakna ringawt pawh hi defender tana hnawksak tham a tling. Bayern nen hian Haaland-a'n second half-ah goal ṭha tak a khung a, offside vang thoin an pawm lo.

Dortmund midfielder Jude Bellingham-a'n talent nei ṭha bik a nihzia a pholang a, English midfielder hi kum 18 chauh a ni chungin a langsar hle. US star ṭhin Claudio Reyna pawhin hmabak êng tak a nei a, kum 18 mi chauh a la ni.

Bench aṭangin Dutch star Donyell Malen, Croatian forward Marco Pasalic leh Brazilian midfielder Reinier te an la lut thei. Kum 19 mi Reinier hian Olympic neih zawh takah khan Brazil tan gold medal a la.

Engtin zel?
Germancup hi Germany coach thar Hansi Flick leh assistant Marcus Sorg ten a hmunah an en a, arsi pali chuanna Die Mannschaft kawr ha tlak an hmu nual ang.

Bayern coach Nagelsmann hi inhliam vangin 2007-08 season khan a football career a tawp a, kum 21 mi chauh a nih hian Thomas Tuchel tan scout hna a thawk. Football-ah thui zawk thlen a tum avangin 'sports science' a zir a, hemi hnuah hian coaching-ah a insawrbing.

Kum 2010-ah Hoffenheim junior team a enkawl a, hetih hunlaia a assistant coach, goalkeeper Tim Wiese chuan 'Mini-Mourinho' tiin hminglem a pe. Kum 2016 aṭangin Hoffenheim senior team a enkawl a, RB Leipzig-ah kal lehin tunah chuan Bayern Munich meuh a enkawl ta.

Bayern hian August 22, Pathianni zan dar 9:00-ah FC Cologne an mikhual dawn a, Borussia Dortmund hian August 21, Inrinni zan dar 7:00-ah SC Freiburg an hmachhawn thung ang.

Supercup kan champion avanga lawm chiam hman kan ni lo. Season liam taa Hansi Flick-a hnuaia league nomawi an chawi zara champion thei kan ni. Kan champion avangin ka lawm takzet, chutihrualin he nomawi hi ka tan ni loin mipui tan zawk a ni.
- Julian Nagelsmann, Bayern Munich

(Julian Nagelsmann tan German Supercup hi a nomawi hmasa ber a ni)

Gerd Muller-a sunna
Supercup ṭan hmain Germany leh Bayern Munich legend Gerd Muller-a sunna hun an buatsaih a, Thomas Muller chuan Bayern jersey - Muller leh no. 9 chuanna chu a pho chhuak. Bavarians hian warm up-naah Muller leh no. 9 chuanna jersey an ha vek bawk.

World Cup leh Euro C'ship-a West Germany champion puitu goal khungtu ropui Muller hi alzheimer natna vangin August 15, Pathianni khan kum 75 mi niin a thi.

Supercup - August 17, Thawhlehni
Venue : Signal Iduna Park
Borussia Dortmund 1 - 3 Bayern Munich
FCB : Robert Lewandowksi 41'; Thomas Muller 50', 74'
BOR : Marco Reus 64'

Player Inlante
Dortmund: Kobel - Passlack (Wolf 84'), Witsel, Akanji, Schulz - Bellingham (Reinier 84'), Dahoud, Reyna (Pasalic 78') - Reus (c) - Moukoko (Malen 58'), Haaland
Unused subs: Hitz, Delaney, Tigges, Knauff, Papadopoul
Coach: Marco Rose
Bayern: Neuer (c) - Stanisic (Sarr 87'), Upamecano, Süle, Davies - Kimmich, Goretzka - Coman (Sane 49'), Müller (Musiala 73'), Gnabry (Tolisso 73') - Lewandowski (Choupo-Moting 88')
Coach: Julian Nagelsmann